Foto: Ashyq derekkóz
«Prezıdent ınvestısııa tartý máselesi birneshe memlekettik organdardyń qaraýynda ekendigine nazar aýdardy. Ulttyq ekonomıka mınıstrligine Syrtqy ister mınıstrligimen birlesip úsh kún merzimde tıisti ózgerister engize otyryp osy baǵyt úshin bir jaýapty memlekettik organdy bekitý jóninde usynystar engizsin», dedi Oljas Bektenov.
Sonymen qatar Premer-mınıstr Prezıdenttiń tehnologııalar men quzyretter bere alatyn jáne jańa naryqtarǵa jol ashatyn iri ınvestorlardy izdep, olardy elge tartý jumysyn kúsheıtý qajettigi týraly tapsyrmalaryn oryndaýǵa basa nazar aýdartty.
Bul rette Oljas Bektenov ornyqty ınvestısııalyq modeldi orta jáne shaǵyn ınvestorlar da qalyptastyra alatynyn atap ótti. Olar básekeles orta qalyptastyryp, óńirlerde jumys oryndaryn qamtamasyz etedi.
Premer-mınıstr «ınvestısııaǵa tapsyrys» tetigin jetildirýdiń mańyzy zor ekenin aıtty. Ol jańa býynnyń ǵylymdy kóp qajet etetin óndiristerin qurýdyń qozǵaýshy kúshine aınalýy kerek.
«Sondyqtan biz óte qysqa (on kún) merzimde ınvestorlarmen biryńǵaı ózara is-qımyl tetigin quryp, ınvestısııa tartý júıesin túbegeıli jańartýymyz kerek. Investısııalar aıasynda tartylǵan árbir teńge normatıvtik aktilermen jáne ońtaıly tájirıbemen bekitilgen myqty kepildiktermen qorǵalýǵa tıis. Ulttyq ekonomıka mınıstrligi Syrtqy ister mınıstrligimen birlesip, ınvestısııa tartý júıesin túbegeıli jańartý jónindegi is-qımyl josparyn daıyndaýǵa dereý kirissin», dep tapsyrdy Premer-mınıstr.
