Foto: pinterest.com
Qarjy jáne bıýdjet komıtetiniń tóraıymy Tatıana Savelevanyń aıtýynsha, zań jobasy 2025 jyldyń 29 tamyzynda úkimet qaýlysymen májiliske engizilgen. Bul qujat memleket basshysynyń qarjy sektoryn damytý jónindegi tapsyrmasyn iske asyrý maqsatynda ázirlengen. Joba bank qyzmetin jetildirýge, jańa bankterdiń ashylýyna jaǵdaı jasaýǵa jáne bank sektoryndaǵy básekelestikti arttyrýǵa baǵyttalǵan.
Zań jobasy boıynsha bıznesti nesıelendirýdi jeńildetetin bazalyq banktik lısenzııa engizý kózdelgen. Sonymen birge qarjylyq uıymdardyń basshylaryna qoıylatyn talaptar kúsheıtiledi. Endi bankter men qarjy uıymdaryn basqarýǵa tek kásibı daıyndyǵy joǵary, bilikti mamandar ǵana taǵaıyndalady.
Taǵy bir mańyzdy jańalyq retinde tólemge qabiletsiz bankterdiń qyzmetin retteý tetikteri engiziledi. Bul salymshylardyń múddelerin qorǵaýǵa jáne qarjy júıesiniń turaqtylyǵyn saqtaýǵa múmkindik beredi.
Sonymen qatar zań jobasy aıasynda ulttyq sıfrlyq qarjylyq ınfraqurylym qurý jáne sıfrlyq teńge men sıfrlyq aktıvterdiń aınalymy úshin zańnamalyq baza ázirlenedi.
