Kezdesýdi Májilistegi QHP fraksııasynyń jetekshisi, Zańnama jáne sot-quqyqtyq reforma komıtetiniń hatshysy, depýtat Magerram Magerramov júrgizdi.
Qatysýshylar Joldaýda kóterilgen bastamalardy talqylap, olardy júzege asyrýdyń naqty joldaryn qarastyrdy. Jıynǵa depýtattarmen birge memlekettik organdardyń ókilderi, sarapshylar, kásipkerler jáne qoǵam belsendileri qatysty.
«Búgin biz Joldaýda aıtylǵan negizgi baǵyttardy saralap qana qoımaı, ony júzege asyrýdyń naqty tetikterin de talqylaımyz dep senemin. Bul jıyn ashyq pikirtalas alańyna aınalary anyq», dedi depýtat.
Jıynda qatysýshylar Prezıdent Joldaýynda aıtylǵan basty máselelerdi talqylady. Olar tapsyrmalardy oryndaý joldary aıasynda óz usynystaryn aıtty. Ásirese barlyq salada sıfrlandyrýdy damytý, Parlamenttiń jumysyn jaqsartý, quqyqtyq, ekonomıkalyq jáne saıası júıelerdi jetildirý, zamanaýı qoǵam qalyptastyrý taqyryptary kóterildi. Kezdesýge depýtattardan bólek memlekettik organdardyń qyzmetkerleri, kásipkerler, sarapshylar jáne azamattyq belsendiler qatysty.
«AMANAT» partııasynyń depýtaty Marat Bashımov jasandy ıntellekttiń múmkindikteri men táýekelderin jaqsylap zertteý kerek ekenin aıtty. Ol JI júıesin basqarý, onyń adamdardyń densaýlyǵyna áseri jáne jańa tehnologııalardy áskerı maqsatta paıdalaný sııaqty máselelerge nazar aýdarý qajet ekenin jetkizdi. Depýtat sonymen qatar sıfrlandyrýdy damytýǵa erekshe kóńil bólý kerek ekenin jáne bul iske jastardy kóbirek tartý mańyzdy ekenin atap ótti.
«Jasandy ıntellekt – kez kelgen el ekonomıkasynyń qozǵaýshy kúshi. Bizdiń qazaq tilinde óz platformalarymyz, óz serverlerimiz bolýy qajet», dedi ol.
«Aýyl» partııasynyń depýtaty Anas Baqqojaev aýyl sharýashylyǵy salasynda sýbsıdııalaý esebin júrgizýge JI-di qoldanýdy usyndy.
«Prezıdent EAEO elderimen salystyrǵanda sýbsıdııalaý deńgeıi boıynsha biz aıtarlyqtaı artta qalyp otyrǵanymyzdy naqty aıtty. Bul bizdiń fermerlerdiń básekege qabletti bolýyna kedergi keltiredi. Kásipkerlerdi tolyqqandy sıfrlyq ortaǵa beıimdeýge daıyn bolýymyz kerek», dedi Baqqojaev.
QHP depýtaty Irına Smırnova bolsa, sıfrlandyrý jemqorlyqpen kúrestiń pármendi tetigine aınalatynyn jetkizdi.
«Barlyq qarjy qozǵalysy ashyq kórsetilse, qarajattyń tıimdi ári maqsatty jumsalýyn baqylaý jeńildeıdi», dedi ol.
Sonymen qatar «Atameken» UKP ókilderi, salalyq qaýymdastyqtar, úkimettik emes uıymdar da óz oı-pikirleri men usynystaryn aıtty.
