Sýretshi qoltańbasynda adam men ǵalamnyń máńgilik baılanysy, rýh pen materııa arasyndaǵy shekara, ýaqyt pen keńistiktiń toǵysýy kórinis tabady. Bul týyndylar tarıh tylsymynan syr tartyp, dástúr men dilge negizdelgen pishinder arqyly órilip otyrady. Mundaǵy árbir shtrıh – oı, árbir boıaý – únsiz syr. Avtordyń Ábilhan Qasteev atyndaǵy óner mýzeıinde ótken shyǵarmashylyq kórmesindegi 60-tan asa keskindemelik týyndy kórermenin oı qushaǵyna tartatyny sondyqtan.
Shynaıy ómir tynysynan syr shertken kompozısııalyq ıdeıalar ishki rýhanı izdeniske baǵyttaıdy. Aıtalyq, «Únsizdik», «Qara shańyraq», «Jalǵyzdyq belgileri», «Kútý», «Tús», «Ákeler joly», «О́mirdiń bastalýy», t.b týyndylaryndaǵy pishinder men túster fılosofııalyq astarǵa toly. Názik talǵam, ár detalǵa degen uqyptylyq kartınalardyń mazmunyn baıytyp, ónerdi kórý ǵana emes, seziný qajettigin uqtyrady.
«Asqar Ahaman shyǵarmalarynda qoldanylǵan pishinder men tústerdiń úılesimi, keńistiktegi qozǵalys pen ýaqyttyń aǵysy adamnyń ishki jan dúnıesimen úndese otyryp, onyń ómirlik jolyndaǵy kúrdeli sezimderi men kúızelisterin beıneleıdi. Árbir týyndysynda sýretshi shynaıy bolmysty kórkemdik tilmen sheber jetkizedi. Bul týyndylar máńgilik ómir men ólim, jalǵyzdyq pen úmit, bastaý men aıaqtalý arasyndaǵy sheksiz baılanystardy jańasha paıymdaýǵa múmkindik beredi», deıdi ónertanýshy Gúlnar Jubanııazova.
Sýretshi máńgilik saýalǵa mán izdeıdi. Shyǵarmalarynda beınelengen árbir kórinis – tirshiliktiń túpki ózegine boılaý, adamzattyń rýhanı bolmysyna úńilý dep topshyladyq. Ol izgilik pen meıirimniń ǵalamǵa sáýle shashar shynaıy nur ekenin aıtyp, «tazalyq – tánde ǵana emes, jan men peıilde» degen úndeý tastaıdy. Sol arqyly kórermenge arman men aqıqattyń, saǵynysh pen úmittiń, ótkinshi men máńgiliktiń arasyndaǵy názik baılanysty sezindirgisi keletindeı.
ALMATY
