Densaýlyq saqtaý basqarmasynyń málimetinshe, arnaıy jabdyqtalǵan kólikterde jalpy dárigerlik, kardıolog, oftalmolog, stomatolog, hırýrg, akýsher-gınekolog, rentgenolog, zerthanalyq dıagnostıka kabınetteri bar. Sondaı-aq flıýorografııa, ÝZI, elektrokardıografııa jáne dárihana pýnkti de qarastyrylǵan.
Kóksý aýdanynda KAMAZ bazasyndaǵy jyljymaly keshen jumys isteıdi. Onyń jetekshisi Gúljan Qorabaevanyń aıtýynsha, ótken jyly munda 14 myńnan astam turǵynǵa medısınalyq kómek kórsetilse, bıylǵy segiz aıda 5,5 myńnan asa adam tekserýden ótken.
JMK-nyń artyqshylyǵy – alys aýyl turǵyndary aýdan ortalyǵyna barmaı-aq, túrli mamandardyń qabyldaýyna kire alady. Muqyry aýylynyń turǵyny Jumadil Joldybaevtyń aıtýynsha, bul ásirese egde jastaǵy adamdar úshin yńǵaıly. Al aýyl turǵyny Dılıara Iýsýpova barlyq mamandardyń bir jerde jumys isteýin erekshe atap ótti.
Sonymen qatar, aýyldyq ambýlatorııalar da jańa mamandarmen tolyqty. Máselen, Muqyry aýylyna jas dáriger Saltanat Temirálıeva «Dıplommen – aýylǵa» baǵdarlamasy aıasynda kelip, memleketten 10 mıllıon teńge kóleminde kóterme aqy alǵan.
Qazirgi tańda oblys aýmaǵynda 8 jyljymaly medısınalyq keshen qyzmet kórsetýde. Onyń 3-eýi KAMAZ, 5-eýi avtobýs bazasynda ornalasqan.
