Aldymen 11–14 qyrkúıek aralyǵynda Sankt-Peterbýrgtegi áıgili Chınızellı arenasynda ótken «Bez granıs» IV Halyqaralyq sırk óneri festıvaline 20 elden 170-ten astam ártis qatysqanyn aıta ketý kerek.
О́ner maıtalmandarynyń oljasy qanshalyqty salmaqty ekenin bylaı bezbendeýge bolady. Máselen, Majarstannan kelgen «Tiri trapesııa» – sheksiz bıiktegi sheberliktiń shyńy bolsa, Qytaı eli akrobattarynyń ǵajaıyp eptiligi, tanzanııalyq tórttik, Ispanııa jonglerleri, Reseıdiń arenada óner kórsetetin 6 zebrasy men 12 maımyly bar «Afrıka» attraksıony kórermenderin tańǵaldyrmaı qoımaıdy. Alaıda halyqaralyq festıvalde Almatydan kelgen «Hassak» tobynyń júrek jutqandarǵa laıyqty óneri naǵyz keremetke aınaldy.
Qatelesýdi keshirmeıtin óner jolynda júrgen otandastarymyz bul trıýkte 180 kg tartatyn úsh adamdy mańdaıymen kóterip, tepe-teńdikti saqtaı otyryp kópirli baspaldaqpen júrip ótedi. Kez kelgen sırk qaıtalaı almaı otyrǵan ekvılıbr trıýktiń áli kúnge deıin dúnıe júzinde balamasy joq ári ol «Almaty Circus Festival» kezinde resmı rekord retinde tirkelip, bas júldeni jeńip alǵan edi.
– Biz óz atymyzdan ǵana óner kórsetken joqpyz. Sırk ónerindegi Qazaqstannyń da sheberligi men deńgeıin tanyttyq. Kórermenderdiń yqylasy men qoldaýy jigerlendirdi, – deıdi «Hassak» tobynyń jetekshisi Ádilet Tıkanov.
Festıvalde óner kórsetken Qazaq memlekettik sırkiniń Ádilet Tıkanov jetekshilik etetin «Hassak» toby qalyń kórermen men halyqaralyq qazylar alqasyn tánti etti.
Oǵan qosa Qazaq memlekettik sırkiniń dırektory Maqsat Maratbekuly atalǵan festıvalge halyqaralyq qazylar alqasynyń múshesi retinde shaqyrylyp, elimizdiń sırk óneriniń kásibı ókili retinde moıyndalǵany da mártebe boldy.
Al qorjyndaǵy qola júldeniń jaıy tómendegideı. Sankt-Peterbýrgtegi festıvalmen qatar sol kúnderi Máskeýdegi Iý.Nıkýlın atyndaǵy sırkte taǵy bir mańyzdy shara – «Artıst» III Halyqaralyq sırk festıvali ótip, oǵan álemniń 18 elinen úzdik ónerpazdar qatysqan edi.
Elimiz atynan álemdik sahnalarda aty tanymal jerlesimiz Taısııa Demıdova óner kórsetti. Taısııanyń qorjynynda Monte-Karlodaǵy halyqaralyq festıvaldiń altyn medali, «Idol» festıvaliniń bas júldesi syndy basqa da salmaqty marapattar bar.
Máskeýde ótken festıvalde Taısııa taǵy da kásibı sheberligin kórsetip, qola júldege ıe boldy.
ALMATY
