Qylmystyq isti tergeýdi Qarjylyq monıtorıng agenttiginiń Atyraý oblystyq departamentiniń qyzmetkerleri júrgizdi.
«Tergeý nátıjesinde A.S.Tıýıakpaevtyń basshylyǵymen S.A.Argalash pen A.S.Býlatovtyń qatysýymen tulǵalar toby uıymdasyp, 8 mlrd teńgege jalǵan shot-faktýralar rásimdeý arqyly qolma-qol aqshaǵa aınaldyrý, salyq tóleýden jaltarý shemasyn qurǵany anyqtaldy. Osynyń saldarynan memleketke 590 mln teńgeden astam salyq tólenbeı, iri kólemde zalal keltirilgen. Tıýıakpaev 342 mln teńge kólemindegi qylmystyq kiristi baqylaýyndaǵy kompanııalardyń esepshottary arqyly óziniń jubaıynyń jeke shotyna aýdarý arqyly zańdastyrǵan», dep habarlady agenttiktiń baspasóz qyzmeti.
Sot sanksııasymen 4 avtokólikke, 2 páter men bir turǵyn úıge tyıym salyndy. Tergeý kezinde kúdiktiler 236 mln teńgeni óz erkimen ótegen.
«Sot úkimimen Tıýıakpaev, Argalash jáne Býlatov kináli dep tanyldy. Olarǵa 2 jyl 4 aıdan 4 jylǵa deıin bas bostandyǵynan aıyrý jazasy taǵaıyndaldy. Qylmystyq jolmen tapqan kiriske satyp alynǵan múlik – Atyraý qalasyndaǵy páter men avtokólik memleket paıdasyna tárkilendi. Qalǵan múlikke qatysty azamattyq talap sheshilgenge deıin qamtamasyz etý sharalaryn saqtaý týraly sot sheshimi qabyldandy», dep málimdedi agenttikten.
Sot úkimi zańdy kúshine engen joq.
