Rýhanı úndestik – kelisimniń berik negizi

Qazaqstan tarıhı Jibek jolynyń torabynda ornalasqan el ǵana emes, sonymen qatar ártúrli mádenıetter men rýhanııattardyń túıisetin tuǵyrly keńistigine aınaldy. Munda «dombyra men gıtara, arfa» qatar úndesip, álemdik mádenıetter sımfonııasyna aınalyp otyr. Bul – Qazaqstannyń mádenı ashyqtyǵy men rýhanı baılyǵynyń kórinisi.

«Bir beldeý – bir jol» bastamasy aıasynda júzege asqan halyqaralyq is-sharalar Qazaqstannyń mádenı jáne rýhanı platforma retindegi rólin nyǵaıta tústi. Mundaı jobalar órkenıet­ter arasyndaǵy ózara baılanysty jańa deńgeıge kóterip, ózara qurmet pen ashyqtyq rýhyn qalyptastyrý­ǵa baǵyttalǵan. Bul – osy sezdiń basty taqyrybymen tolyq úndesetin qundylyqtar.

Býddızm álemdegi bar­lyq nárse bir-birimen tyǵyz baılanysty dep úıret­edi. Hrıstıan dininde adam­ǵa jaqsylyq jasap, ja­qynyńdy ózińdeı súıý kerek deıdi. Islamda sabyr saqtaý pen meıirimdilik bas­ty qasıetterdiń biri. Al daosızm bolsa, tabıǵatpen úılesimde ómir súrýdi nasıhattaıdy. Osy dinderdiń bári, árıne, árqaısysy óz jolymen, adamdardy izgilikke, túsinistikke jáne beıbit ómirge shaqyrady. Sondyqtan bul rýhanı ilimder dinaralyq dıalog úshin berik negiz qalyptastyrady. Dinı dástúrler adamzattyń ortaq rýhanı tájirıbesi retinde birige otyryp, beıbit ómir men kelisimdi qamtamasyz ete alady.

Búginde bizdi alańdatatyn jahan­dyq problemalar klımattyń ózge­rýi, asharshylyq, qaqtyǵystar – bar­­­­shamyzǵa ortaq syn-qaterler. Bul má­se­lelerdi tek saıası nemese tehnologııalyq tásildermen emes, rýhanı jáne moraldyq kózqaraspen de qarastyrýymyz qajet. Sondyqtan din kóshbasshylary jastar tárbıesine, otbasylyq jáne adamgershilik qun­dylyqtardy nyǵaıtýǵa, mádenı jobalar aıasyndaǵy yntymaqtastyqqa erekshe nazar aýdarýǵa tıis.

Din ókilderi nasıhatpen ǵana emes, naqty árekettermen de úlgi kórsetýleri qajet. Biz ıgi ıdeıalardy naqty iske aınaldyrýymyz kerek. Bos sóz emes, shynaıy rýhanı energııa adamzatqa úmit sáýlesin syılaıdy. Sol arqyly beıbit ómirge jol ashylady.

Bul rette Qytaı býddashylar qaýym­dastyǵy álemdik dindermen birlese áreket etýge daıyn ekenin jetkizg­im keledi. Biz kelispeýshilikti keli­sim kemesine salyp, senimdi jelken etip, naqty áreketti eskekke aınal­dyrsaq qana, ortaq beıbit jáne baqytty bolashaqqa jete alamyz.

Szın BO,

Qytaı býddashylar qaýymdastyǵy tóraǵasynyń orynbasary