Osyndaı qıyn-qystaý ahýal qysqan sátte Qazaqstan barsha adamzattyń túrli dinı ustanymdaǵy rýhanı kóshbasshylaryn Shyǵys pen Batystan, Soltústik pen Ońtústikten, túrli mádenı jáne dinı ortadan jınap, birneshe jyldan beri ortaq dıalog ornatýǵa bastamashy bolyp keledi.
Osy sezge qatysa otyryp, beıbitshiliktiń múmkin ekenine, birliktiń ornaı alatynyna kóz jetkizesiń. Ártúrlilikti jeke tulǵanyń nemese halyqtyń bolmysyna tónetin qaýip emes, kerisinshe baılyq ekenin sezinesiń. Sondyqtan dál qazirgideı álemdik qaqtyǵystar órship turǵan kezeńde mundaı alańdardyń mańyzy asa zor. Men musylman retinde Qazaqstannyń osyndaı ıgi bastamany qolǵa alyp, bitimgerlik baǵytta úlken ról oınap otyrǵanyna erekshe rızamyn. Qazaqstan bul sezdi 20 jyldan asa ýaqyt boıy úzbeı ótkizip keledi. Bul – eldiń bedeli men jaýapkershiliginiń aıqyn aıǵaǵy.
Astananyń osyndaı senimdi dıalog alańyna aınalýynyń basty sebebi shaqyrylǵan delegattardyń Qazaqstanǵa degen senimi dep oılaımyn. Munda kelgen adamdar ózin jaıly sezinedi. Árıne, bizdiń ıdeologııalyq, saıası, dinı aıyrmashylyqtarymyz bar. Biraq soǵan qaramastan Qazaqstan qoǵamy men memleketi árbir ókilge qurmetpen qaraıtynyn biledi. Osylaısha, pikir alshaqtyǵyna qaramaı, ortaq mindettemeler qabyldap, birlesken qadamdar jasaýǵa múmkindik beredi. Bul – ádilettirek ári gýmanıstik dúnıege bastaıtyn ortaq jol.
Sondyqtan men sizderdiń eldi jáne qoǵamdy, el bıligin osyndaı bastamasy úshin shyn júrekten quttyqtaımyn. Bul – álemge qozǵaý salar óte mańyzdy úlgi. Aıtpaqshy, bıyl alǵash ret Argentınadan ókil qatysyp otyr. Osy turǵydan da men bul shaqyrtýdy ózim úshin úlken mártebe sanaımyn.
Marýan Sarýar GIL,
Argentınadaǵy Ahmadııa musylman qaýymdastyǵynyń ımamy ári prezıdenti
