Jalpy otyrysta depýtattarǵa «Jasandy ıntellekt týraly» zań jobasyn ilespe túzetýlerimen ekinshi oqylymda qaraý usynylady. Májilis depýtattary bastama kótergen qujattar jasandy ıntellekt tehnologııalaryn qoldanýǵa biryńǵaı quqyqtyq negiz qurýǵa baǵyttalǵan. Olar tutynýshylardyń jáne derbes derekterdiń quqyqtaryn qorǵaýdy qarastyrady. Sondaı-aq jasandy ıntellektini qoldanýǵa baılanysty quqyqbuzýshylyqtar úshin ákimshilik jaýapkershilikti belgileıdi. Zańnyń qabyldanýy Memleket basshysynyń Joldaýyn is júzinde júzege asyrýdaǵy mańyzdy qadam bolmaq.
Sonymen qatar depýtattardyń talqylaýyna Qazaqstan men Marokko arasyndaǵy ustap berý, sottalǵan adamdardy berý jáne qylmystyq ister boıynsha ózara quqyqtyq kómek týraly kelisimder engizildi. Kelisimder eki memlekettiń quzyrly organdarynyń ekstradısııa, sot úkimderin oryndaý jáne qylmystyq ister boıynsha quqyqtyq kómek kórsetý salasyndaǵy yntymaqtastyǵyn damytýǵa baǵyttalǵan.
Jalpy otyrysta qylmystyq jolmen alynǵan kiristerdi zańdastyrý (jylystatý) jáne terrorızmdi qarjylandyrý táýekelderin baǵalaý halyqaralyq ortalyǵyn qurý týraly kelisimdi ratıfıkasııalaý týraly zań jobasyn qaraý usynylady. Ortalyq halyqaralyq aqparattyq júıe retinde jumys isteıdi, ol TMD elderiniń qarjylyq barlaý bólimshelerin anyqtalǵan qaýip-qaterlerge ýaqtyly áreket etý úshin biriktiredi. Sondaı-aq elderge transshekaralyq táýekelderdi taldaýǵa, statıstıkalyq derektermen almasýǵa, olardy tómendetý boıynsha usynymdar ázirleýge jáne FATF halyqaralyq standarttaryna sáıkes tásilderdi úılestirýge múmkindik beredi.
Sondaı-aq jalpy otyrys barysynda Májilis komıtetteri jańa zań jobalaryn jumysqa alady. Konstıtýsııalyq sot sheshimderin oryndaý máseleleri boıynsha ózgerister men tolyqtyrýlar engizý týraly, Qylmystyq-prosestik kodeks pen Ákimshilik quqyq buzýshylyq kodeksine tolyqtyrýlar engizý, sondaı-aq Qazaqstan men Mońǵolııa úkimetteri arasyndaǵy zeınetaqy salasyndaǵy yntymaqtastyq týraly kelisim bar.
