Álemniń túrli elinen 23 oryndaýshy qatysatyn halyqaralyq baıqaýda qazaq ánshisi «Dala tańy» atty kompozısııasyn oryndaıdy. Mýzykasyn Ámireniń ózi, al sózin aqyn Saıat Rahymjanov jazǵan. Bizdiń úmitkerdiń óner kórsetýi ádettegiden erekshe bolmaq. Sebebi sahnaǵa ónerpazben birge segiz jastaǵy Jasmın Qaıratqyzy da shyǵady. Ol – qazaqstandyq delegasııanyń eń jas qatysýshysy. Osy mańyzdy rólge arnaıy kastıng jarııalanyp, 100 úmitkerdiń ishinen Jasmın eń úzdik dep tanylǵan. Qalǵan jaıttar ázirge qupııa. Bizge belgilisi qazaq delegasııasynyń bas prodıýseri Altynbek Rahmetovtiń myna pikiri: «Bul án barlyq qatysýshynyń júregin jaýlap aldy. Olar birge shyrqap, áýenin aıtyp júr. Bizdiń eń basty maqsatymyz – ánimizdiń elimizde keń taralǵany», depti ol.
Halyqaralyq baıqaý qazirdiń ózinde mıllıondaǵan kórermenniń nazaryn aýdaryp otyrǵan kórinedi. Uıymdastyrýshylardyń ha-
barlaýynsha, tikeleı efır tórt qurlyqqa taratylady. «Intervıdenıe-2025» baıqaýyna qatysýshylar jáne delegasııalarmen jumys isteý departamentiniń basshysy Tatıana Selıverstovanyń aıtýynsha, qatysýshy elderdiń barlyǵynda baıqaýdyń tikeleı efıri nemese bir táýlik ishinde jazbasy kórsetiledi. «Bul – baıqaýda 2 mıllıardtan astam adam tamashalaı alady degen sóz» deıdi.
Baıqaý daýys berý arqyly sheshiledi. Ol týraly Ámireniń ózi:
«Maǵan adamdar qalaı daýys beretini óte qyzyq. Ádette, biz qandaı da bir elge barsaq, onda tek sol eldiń ókilderi ǵana bolady da, óz baǵalaryn qoıady. Al munda 20-dan astam eldiń ókilderi bar, olar bir-birimen onsha tanys emes. Sol sebepti baǵa anaǵurlym ádil bolady dep oılaımyn», deıdi.
