Senbilikke qala turǵyndary, eńbek ujymdary, memlekettik organdar qyzmetkerleri, shaǵyn jáne orta bıznes ókilderi (bazarlar, saýda jáne oıyn-saýyq ortalyqtary, kafeler, meıramhanalar jáne t.b.), volonterler, máslıhat depýtattary, úkimettik emes uıymdar, mádenıet jáne sport qaıratkerleri, PIK (MIB) jáne basqa da uıymdar qatysyp jatyr.
Ekologııalyq aksııa aıasynda elordada sanıtarlyq tazalaý jumysy júrgizilip jatyr: nóser jáne aryq júıelerin tazartý, kóshelerdi, trotýarlardy, aýlalardy, qoǵamdyq keńistikterdi jınaý jumystary qolǵa alyndy. Sonymen qatar jasyl jelekterdi kútip-baptaý jáne otyrǵyzý, saýda nysandaryna irgeles aýmaqtardy tazalaý, ruqsatsyz qoqys úıindilerin joıý sekildi jumystar júrgizilip jatyr.
Qala turǵyndary tazalyq pen tártipke belsene atsalysýda. Birqatar aýlanyń turǵyndary birlese shyǵyp, qalanyń tazalyǵyna atsalysyp jatyr.
«Búgingi senbilik ádettegi tazalyq emes, shyn máninde aýla merekesine aınaldy. Biz búkil otbasymyzben shyqtyq, kórshiler bas qostyq, tipti balalarymyz da kómektesti.
Osyndaı sátterde qalanyń barshamyzǵa ortaq úı ekenin sezesiń, ondaǵy tártip árqaısymyzǵa baılanysty. Jumystan keıin kórshilermen áńgimelesip, ázildesip, aýlada otyryp demalǵan da jaqsy eken. Mine, jaıly Astanany osylaısha birge jasaımyz», – dedi Saryarqa aýdanynyń turǵyny.
Masshtabty tazalyq jumysy barysynda elordanyń barlyq alty aýdanynda aǵash otyrǵyzý da umyt qalǵan joq.
«Biz qalany kún saıyn taza ustaýǵa tyrysamyz, biraq turǵyndar da atsalyssa, nátıje eki ese baıqalady», – dedi kommýnaldyq qyzmet mamandarynyń biri.
Aıta keteıik, elordada 13 qyrkúıekten 11 qazanǵa deıin dástúrli ekologııalyq aılyq «Taza Qazaqstan: Taza Astana» ótip jatyr.
