Foto: egemen.kz/ Qyrmyzy Jumaǵalıqyzy
Qazaqstannyń medısınalyq týrızmdi damytý múmkindigi
Otandyq medısınanyń neıro jáne kardıohırýrgııa, perınataldyq medısına, nevrologııa jáne stomatologııa salalary sheteldikter tarapynan joǵary qyzyǵýshylyqty týdyryp otyr. Máselen, Qazaqstandyq medısınalyq týrızm qaýymdastyǵynyń málimetinshe, elimizge em izdep kelgender sany 2022 – 2024 jyldar aralyǵynda 1200-den 80 myń adamǵa ósken. Kórshi memleket azamattarynan bólek Germanııa, AQSh, Izraıl, BAÁ jáne Shveısarııadan keletin medısınalyq týrıster legi birtindep artyp keledi. Nurgúl Taý oń kórsetkish kezdeısoq emes, naqty faktorlar negizinen kóterilip otyrǵanyn tilge tıek etti. Onyń alǵashqysy halyqaralyq akkredıt bolsa, ekinshisi elimizdegi joǵary sapaly medısınalyq qyzmetter basqa elderge qaraǵanda áldeqaıda qoljetimdi ekendigi. Máselen, Astana ákimdigine qarasty «Astanany damytý ortalyǵynyń» aqparatyna sáıkes Qazaqstanda júrek shýnttaý hırýrgııasy AQSh-qa qaraǵanda 80 ese, Sıngapýrǵa qaraǵanda 11 ese arzan. Úshinshi, eldegi medısınalyq uıymdardyń medısınalyq týrıstterdi tartýǵa ekonomıkalyq jaǵynan múddeli bolýy.
Osyndaı irgeli múmkindikterdi qomaqty ekonomıkalyq tabysqa aınaldyrý tusy turalap turǵany jasyryn emes. Májilis depýtaty saýalynda salada sheshimin tabýy tıis máselelerdi atady.
«Eldegi medısınalyq uıymdar men týrısttik operatorlardyń arasyndaǵy ózara árekettestik joqtyń qasy. Máselen, medısınalyq mekemeler týrısttik-bızneske beıimdelmegendikten týrıstterge bıletterdi satyp alý, turmystyq jaǵdaıdy uıymdastyrý sııaqty qosymsha qyzmetterdi sapaly túrde bere almaıdy. О́ıtkeni, bul týrısttik uıymdardyń quzyrynda. Sol sebepten, klınıkalar men medısınalyq týrısterge saýatty qoldaý kórsete alatyn Medısınalyq týrızm salasyndaǵy Biryńǵaı operatordy qurý qajet dep oılaımyn. Onyń quzyretine dıagnostıka jáne emdeý boıynsha konsaltıng, týrıstterdiń sanyn tirkeý, týrısttik ónimdi usyný, tasymal jáne medısınalyq aýdarmashy qyzmetin kirgizýge bolady», dedi Nurgúl Taý.
Túrkııa tájirıbesi
Suranys artsa baǵa da kóteriletini - naryq zańy. Bul máseleni de aldyn – ala baǵamdaǵan abzal. Nurgúl Taý bizge bergen jaýabynda osy turǵyda Túrkııa tájirıbesin ustyn etýdi usyndy.
«Álemdik úzdik úlgiler qatarynan tabylatyn Túrkııada medısınalyq týrızmdi damytý ulttyq strategııa deńgeıinde iske asyrylady – Health Tourism Vision 2030 baǵdarlamasy qabyldanǵan. Baýyrlas elde suranys sońynan qaltaǵa salmaq salmaý úshin jergilikti halyqqa basqa, sheteldik em alýshylarǵa ózge baǵa bekitilgen. Bizdiń elde osy úlgini ustanǵany durys», dedi depýtat.
Medısınalyq týrızmdi jolǵa qoıǵan Túrik elinen alatyn ózge de tushymdy tájirıbeler jetkilikti. Sonyń biri medısınalyq týrızmdi túletý baǵytynda jumys istep otyrǵan týroperatorlarlar men medısınalyq mekemelerdi qoldaýdyń memlekettik júıesi.
«Túrkııa medısınalyq uıymdar men týroperatorlarǵa: halyqaralyq kórmelerge qatysýǵa sýbsıdııalar beredi, marketıng shyǵyndaryn ishinara óteıdi, sheteldik pasıentterge qyzmet kórsetý sapasyn arttyrý úshin granttar men jeńildetilgen nesıeler usynady. Qatysýshylarǵa qyzmetti Türkiye Health Tourism Council dep atalatyn ortalyq organ úılestiredi. Onda iri klınıkalar, ásirese jekemenshik medısına uıymdary (Acıbadem, Memorial, Anadolu) ózderiniń ishki týrızm bólimshelerin nemese seriktes týroperatorlardy paıdalanady. Memlekettik qoldaý men utymdy júıeniń nátıjesinde naýqas emdeýden bólek, týrıstik qyzmetterdi bir tereze qaǵıdatymen alady», degen Respublica partııasy fraksııasynyń múshesi medısınalyq týrızm deńgeıin arttyrý úshin medısınalyq týrıstterge arnalǵan arnaıy sıfrlyq vızany qolǵa alýdy usyndy.
Sondaı-aq qazaqstandaǵy medısınalyq uıymdardyń medısınalyq týrısterge qyzmet kórsetýge daıyndyǵynyń tómendigi de kókeıkesti másele. Nurgúl Taý bul baǵytta Astana men Almatydan bólek óńir uıymdarynyń da áleýetin arttyrýdy atap ótip, bazasy myqty jekemenshik klınıkalarǵa da jan-jaqty qoldaý kórsete otyryp, qyzmetin keńinen paıdalanýy qajet ekenine de nazar aýdardy.
