О́ndirýshilermen jáne saýda nysandarymen tııanaqtalǵan baǵalar boıynsha myńnan astam kelisim-shart jasaldy. Qazir óńirde áleýmettik mańyzy bar azyq-túlik taýarlaryn naryqtaǵydan tómendetilgen baǵamen usynatyn 39 saýda núktesi jumys isteıdi.
Baǵany turaqtandyrý júıesi jyl saıyn qoldanylady. Onyń basty maqsaty – naryqtaǵy baǵanyń kúrt ózgerýiniń aldyn alý jáne halyqty qoljetimdi baǵada negizgi azyq-túlik ónimderimen qamtamasyz etý. Qala turǵyndarynyń qajettiligin óteý maqsatynda aldyn ala negizgi kókónis túrleri daıyndaldy. 4 myń tonnadan astam kartop, myń tonnadaı sábiz, myń tonnaǵa jýyq qyryqqabat jáne 800 tonnaǵa jýyq pııaz ázirlendi.
–Oblys boıynsha áleýmettik mańyzy bar azyq-túlik taýarlary baǵasynyń ósýin tejeý maqsatynda kún saıyn baǵaǵa monıtorıng júrgiziledi, – deıdi oblystyq kásipkerlik jáne ónerkásip basqarmasynyń bólim basshysy Ánýar Qalymjanov, – dúken sórelerindegi taýarǵa 15 prosentten joǵary ústemeni asyra qoldaný derekterin anyqtaý jumystary atqarylady. Monıtorıng nátıjelerin taldaý azyq-túlik taýarlarynyń baǵasyn qalyptastyrý tizbegi boıynsha deldaldyq shemalardy tergep-tekserý jónindegi komıssııa arqyly júzege asyrylady. Jyl basynan beri baǵany turaqtandyrýǵa qatysty 70-ke jýyq otyrys ótkizilip, 150-den asa zań buzýshylyq deregi anyqtaldy. Anyqtalǵan barlyq fakti boıynsha zańdy belden basqandarǵa qatysty tıisti shara qoldanyldy.
Áleýmettik mańyzy bar azyq-túlik taýarlarynyń tizbesine engizilgen negizgi 19 azyq-túlik ónimi turaqtandyrý qorynyń baǵasymen satylýda. Aıta ketý kerek, jyl basynan beri óńirde aýyl sharýashylyǵy taýaryn óndirýshilerdiń qatysýymen 186 jármeńke ótkizildi. Sondaı-aq, elorda halqy úshin 3 oblystyq jármeńke uıymdastyryldy.
Kókshetaý
