Eńbek adamy – otbasynyń shamshyraǵy, memlekettiń qýat kúshi. Memleket basshysy Q.Toqaev «Adal azamat» uǵymyn tanytatyn mundaı adamdarda eńbekqorlyq, kásipkerlik pen jaýapkershilik, sondaı-aq bilim men ózin-ózi damytýǵa degen turaqty umtylys aıqyn kórinetinin atap ótti.
«Eńbekqorlyq – eń asyl qasıettiń biri. Men ár sózimde osy máselege erekshe mán beremin. Mańdaı termen kelgen adal eńbektiń qadirin biletin jurt ozyq oıly ult bolady. Halqymyzda «Eńbegine qaraı – qurmeti» degen jaqsy sóz bar. Eńbek adamy – el adamy. Eńbek adamy, eń aldymen, týǵan eliniń jarqyn keleshegi úshin aıanbaı jumys isteıtin adam. Sondyqtan qazir biz elimizde jumysshy mamandaryn keńinen dáriptep, olarǵa erekshe qurmet kórsetip jatyrmyz», dedi Prezıdent.
Adal azamat – adaldyq pen ádildikti birinshi orynǵa qoıa otyryp, kóp jumys isteıtin, tabysqa jetetin jaqsy qasıetteri bar adam. Adal eńbekpen kelgen jetistik «Eńbekpen kelgen tabys qana sińimdi» degen shynaıy qanaǵat ákeledi.
Eńbek kúni álemniń 100-den astam elinde atap ótiledi. Mereke kúni aıasynda elimizde jyl saıyn «Eńbek adamynyń» qoǵamdyq bedelin kóterýge, jumys ónimdiligin arttyrýǵa, eńbekke qurmetpen qaraý mádenıetin qalyptastyrýǵa, eńbek dástúrlerin jalǵastyrýǵa baǵyttalǵan túrli is-shara uıymdastyrylady. Jastardy tárbıeleýge, sondaı-aq kásiporyndar men uıymdarda eńbek áýletterin qurý ıdeıasyn qoldaýǵa erekshe nazar aýdarylady. Aıtalyq, 2016 jyldan beri «Eńbek joly» respýblıkalyq baıqaýy jyl saıyn ótkizilip keledi. Atalymdardyń biri «Jumys istep júrgen jastardyń úzdik tálimgeri» dep atalady, munda jeńimpaz retinde 20 jyldan astam tájirıbesi bar, júzdegen jas mamandy tárbıelegen mamandar tanylady.
Turǵyndardy jumyspen qamtý, jańa jumys oryndaryn ashý – qashannan áleýmettik saıasattyń basty baǵyty. Memleket basshysy 2029 jylǵa deıin 3,3 mln azamatty jumysqa ornalastyrýdy tapsyrdy. Búginde jospar 75% oryndaldy. 2025 jyldyń basynan 534 myńǵa jýyq adam jumys tapty, olardyń 141 myńy jumyspen qamtýǵa járdemdesýdiń belsendi sharalarymen qamtyldy. Sapaly jumys oryndarynyń sany 2,6 mln-ǵa jetti, 2029 jylǵa qaraı olardyń sany keminde 3,8 mln bolady.
Elimizde 266 991 teńge ortasha jalaqymen 119 myń múgedektigi bar adam eńbek etedi. Jumyspen qamtý baǵdarlamalaryna 320,5 myń jas tartylǵan, onyń ishinde 100 myńnan astamy turaqty negizde 49 myń jumys tapty.
О́ńirlerde ardagerler men óndiris sheberleri, sharýashylyq ozattary zor qurmetke ıe. Eńbekkerdiń qoǵamdaǵy bedelin arttyrý, qoǵamdaǵy «Eńbek adamy» qundylyqtaryn ilgeriletý, ónimdi eńbekti yntalandyrý, jumysshy mamandyqtardy nasıhattaý, jastardy óndiris salasyna tartý, jumysshy áýletterdiń kópjyldyq dástúrin nyǵaıtý maqsatynda birqatar memlekettik nagrada, syı-sııapat taǵaıyndalǵan. Olarmen kásiporyndardaǵy, mekemelerdegi, uıymdardaǵy jemisti eńbegi, tıisti salalardaǵy joǵary kórsetkishteri úshin ónerkásip, kólik, qurylys, aýyl sharýashylyǵy, basqa da salalardyń qyzmetkerleri marapattalady.
Qarapaıym eńbek adamdarynyń tynymsyz jumysy arqyly óndiris, aýyl sharýashylyǵy, qurylys, kólik, bilim, densaýlyq saqtaý salalary damıdy. Eńbekqor adam – tártip pen tabandylyqtyń belgisi. Mundaı azamattar jastarǵa úlgi, qoǵamǵa senim uıalatady. Qyzmetine qaramaı, kez kelgen adamnyń eńbegin baǵalaý – ádiletti qoǵamnyń basty kórsetkishi. Qurmetke ıe bolǵan eńbekker óz isine odan ári yntalanyp, kásibıligin arttyrýǵa tyrysady.
Adamnyń jasampaz eńbekke adaldyǵy – onyń otbasynyń maqtanyshy, mártebesi. Kez kelgen otbasynyń senimdi tiregi – óziniń eńbegimen, sheberligimen baılyqty qamtamasyz ete alatyn, balalarǵa úlgi bola alatyn, aǵa urpaqqa qoldaý kórsete alatyn adam. Adal, eńbekqor adam laıyqty mura quryp qana qoımaı, kásibine qaramastan kez kelgen eńbek qurmetteletin qoǵamdy nyǵaıtady. Qarapaıym jumysshylardyń arqasynda ónerkásip pen óndiris damyp, el ekonomıkasy kúsheıe túsedi.
Eńbek – eldiń erteńi. Eńbek kúnin atap ótý – mańdaı terdiń qadirin taný, eńbektiń qoǵamdaǵy rólin tereń túsiný. Bul – ár sala mamandaryna alǵys bildiretin, jastardy adal qyzmetke yntalandyratyn mereıli mereke. Eńbek adamyna qurmet kórsetý – el bolashaǵyna qurmet kórsetý, qoǵamnyń damýyna, eldiń órkendeýine tikeleı úles qosatyn qarapaıym jumysshy, sharýa, qurylysshy, júrgizýshi, malshy sekildi mamandardyń eńbegin baǵalaý, qadirleý – adamgershilik pen órkenıettiliktiń belgisi.
