PETROPAVL. 8 mamyr. Oblys ortalyǵynda osymen 23-shi ret toılanǵan Otan qorǵaýshylar kúni erliktiń pen eldiktiń joǵary qasıetti belgisi retinde jurtshylyqtyń belsene qatysýymen joǵary deńgeıde uıymdastyryldy. Bul týraly egemen. kz tilshisi habarlady.
Ásirese, óskeleń urpaq boıynda qazaqstandyq patrıotızm sezimderininiń joǵary úlgisin qalyptastyratyn mańyzdy shara qazaq jerin jońǵar shapqynshylarynan qorǵaýǵa tize qosyp attanǵan qos bahadúr – Qarasaı men Aǵyntaı batyrlardyń eskertkishine gúl shoqtaryn qoıýdan bastaldy. Bul rásim ótelgennen keıin qaraqurym kópshilik sap túzegen boıy Qazaqstan Konstıtýsııasy boıymen jyljı otyryp, ortalyq alańǵa keldi. Munda LED ekrany arqyly Prezıdent N. Nazarbaevtyń Qazaqstan halqyna arnaǵan merekelik tilegi, Respýblıka Qarýly Kúshteriniń eń úlgili qurylymdarynan jasaqtalǵan áskerı sherý tamashalandy.
«Otanǵa qyzmet etemin!» sharalar baǵdarlamasyn oblys ákimi Erik Sultanov ashyp, soltústikqazaqstandyqtardy aıtýly merekemen quttyqtady. Elbasy atynan soǵys jáne tyl ardagerleri Sadyqan Qazbaevqa, Petr Iаzykovqa «Qurmet» ordenderin saltanatty jaǵdaıda tabys etti. Uly Jeńiske sanaýly kúnder qalǵanda 92 jasynda kóz jumǵan Jusypov Erdenbaı aqsaqaldyń memlekettik marapatyn uly Erkin qabyldady. 4 ardager «Eren eńbegi úshin» medaline, eki ardager Qurmet Gramotasyna ıe boldy. Otan aldyndaǵy múltiksiz eńbegi, qyzmettegi joǵary kórsetkishteri, jeke tártiptiligi úshin 20 áskerı qyzmetkerge aımaq basshysynyń Qurmet gramotalary men Alǵys hattary tartý etildi.
«Jeńis» saıabaǵynda aıaqdop jáne voleıbol sheberleri kúsh synassa, I. Shýhov atyndaǵy ortalyq kitaphanada «Qazaqstannyń erjúrek uldary» atty erlik saǵaty ótti. «Dástúrler súrleýimen» taqyrybyndaǵy tarıhı ekskýrs ta tanymdylyǵymen este qaldy.
Otan qorǵaýshy kúni odan ári «Jelbire, Jeńis jalaýy!» ádebı-sazdy kompozısııaǵa ulasyp, jergilikti kórkemónerpazdardyń konserttik baǵdarlamasymen túıindeldi.
О́mir Esqalı.
Derek, sýret: egemen.kz
