Foto: Qorǵanys mınıstrligi
Qoǵam da qordalanǵan bul máselege beı-jaı qaramaıdy. Sondyqtan búginde sarbazdardyń analarynan qurylǵan «Analardyń júregi» komıteti qarqyndy jumysqa kirisken.
«Budan basqa, moraldyq-psıhologııalyq ahýaldy monıtorıngteý maqsatynda bólimshelerde anonımdi saýalnama ádisimen saýalnamalar júıeli túrde júrgiziledi, olardyń nátıjeleri ýaqytyly sharalar qabyldaý úshin áskerı bólimderdiń komandırlerine (mekemeler bastyqtaryna) jetkiziledi. Qarýly Kúshter, basqa da áskerler men áskerı qurylymdar ókilderiniń qatarynan qoldanylatyn psıhodıagnostıkalyq ádistemelerdiń ózektiligin qaraý, zertteýdiń jańa jáne tıimdi ádisterin engizý, qoldanystaǵy normatıvtik-quqyqtyq aktilerge ózgerister men tolyqtyrýlar engizý, áskerge shaqyrylýshylardy zerdeleýdiń, irikteýdiń jáne jeke qurammen tolyqtyrýdyń biryńǵaı tártibin aıqyndaýǵa qatysty, olardaǵy qyzmettiń ereksheligin eskere otyryp, jumys toby quryldy», dedi Arman Qalyshev.
Bul máselemen kúreskennen onyń aldyn alǵan tıimdi ekeni barshaǵa aıan. Sondyqtan jaýapty Qorǵanys mınıstrligi sýısıdke beıim azamattardy erte anyqtaýǵa den qoıyp otyr. Osy maqsatta vedomostvo AI-sulu Telegram-boty men PSY - táýekel ádistemesin iske qosqan.
«PSY-táýekel (PSY-RISK) – áskerge shaqyrý kezeńinde qoldanylatyn reglamenttelgen kópsatyly psıhodıagnostıkalyq tetik. Bastapqy skrınıng, tereńdetilgen psıhologııalyq tekseris, qajet bolsa psıhıatrııalyq saraptama júrgizedi. Júıe sýısıdtik beıimdilik belgileri bar tulǵalardy erte anyqtap, olardy qyzmetke jibermeý nemese qosymsha medısınalyq baǵalaýǵa joldaý arqyly bólimderdegi moraldyq-psıhologııalyq klımat pen qaýipsizdikti qorǵaýdy kózdeıdi. Bul rásim qujattyq túrde negizdelip, nátıjeleri qyzmetke jaramdylyq týraly uıymdastyrýshylyq-quqyqtyq sheshimderge negiz bolady jáne jalǵan oń-teris kórsetkishterin tómendetý úshin ádistemelik baqylaýmen súıemeldenedi», dedi Qorǵanys mınıstrligi Tárbıe jáne ıdeologııalyq jumystar departamenti Psıhologııalyq jáne áskerı-áleýmettik jumystar basqarmasynyń bastyǵy.
Al AI-sulu Telegram-boty áskerı qyzmetshiler men olardyń otbasylaryna arnalǵan anonımdi sıfrlyq kórsetkish. Táýlik boıy qazaq jáne orys tilderinde qysqa psıho-bilim berý materıaldaryn, ózin-ózi retteý algorıtmderin, kúızelisti azaıtýǵa arnalǵan jattyǵýlardy usynady jáne qajet bolǵanda bólim psıhologyna ne medısınalyq qyzmetke baǵyttaıdy. Iаǵnı el armııasyndaǵy kiltıpandy joıý úshin qyzmetke shaqyrýshylar men qatar áskerı qyzmetshiler de arnaıy ázirlikten ótip, keńeske júgine alady.
«AI-sulu – qyzmet barysyndaǵy jedel qoldaý men resýrstarǵa baǵyttaıtyn sandyq navıgasııa, al PSY-táýekel – shaqyrý aldyndaǵy irikteý jáne aldyn alý quraly. Birinshisi qupııalylyq pen 24/7 qoljetimdilik arqyly erte kómekke jol ashady; ekinshisi kadrlyq qaýipterdiń aldyn alyp, oqys jaǵdaılardyń jıiligin azaıtady. Ekeýi birge «irikteý, beıimdelý, úzdiksiz psıhologııalyq súıemeldeý» tutas kontýryn qalyptastyryp, áskerdiń psıhologııalyq turaqtylyǵyn júıeli túrde kúsheıtedi», dep túsindirdi maman.
