Máýlen Áshimbaev mártebeli meımanǵa iltıpat bildirip, sapar baǵdarlamasynyń aýqymdy ekenin tilge tıek etti. Sonyń aıasynda Majarstan Prezıdenti Memleket basshysy Qasym-Jomart Toqaevpen birge Digital Bridge – 2025 Halyqaralyq IT-forýmyna qatysqanyn aıta ketken jón. Senat tóraǵasy atap ótkendeı, mundaı mazmundy sapar baýyrlas elder ekijaqty yntymaqtastyqty odan ári nyǵaıtýǵa múddeli ekenin kórsetedi.
Sondaı-aq Qazaqstan men Majarstan arasynda dıplomatııalyq qarym-qatynas ornaǵan otyz jyl ishinde qos memleket arasynda senimdi saıası dıalog, berik ekonomıkalyq yntymaqtastyq jáne tyǵyz mádenı-gýmanıtarlyq baılanys qalyptasqany sóz boldy.
«Keıingi jyldar Qazaqstan men Majarstan yntymaqtastyǵy úshin óte nátıjeli boldy deýge tolyq negiz bar. Bul rette Qazaqstan Prezıdenti Qasym-Jomart Toqaevtyń byltyr Býdapeshtke jasaǵan alǵashqy memlekettik saparyn aıryqsha atap ótken jón. Sonyń qorytyndysy boıynsha eki eldiń strategııalyq seriktestikti odan ári nyǵaıtýǵa jáne ortaq bastamalardy iske asyrýǵa beıil ekenin kórsetetin birlesken málimdeme qabyldandy. Odan bólek, saýda-ekonomıkalyq salada birqatar mańyzdy kelisimge qol qoıyldy. Sizdiń saparyńyz memleketaralyq ózara is-qımyl men yntymaqtastyqqa tyń serpin berip, ekijaqty qatynastardyń kún tártibin jańa mazmunmen baıyta túsedi dep senemiz», dedi M.Áshimbaev.
Suhbat barysynda Qazaqstan men Majarstan arasyndaǵy ózara is-qımyldy arttyrýda parlamentaralyq dıalog mańyzdy ról atqaratyny aıtyldy. Osyǵan oraı dostyq toptary men parlamentaralyq uıymdar aıasyndaǵy yntymaqtastyqty jáne parlamentaralyq baılanystardy ári qaraı jandandyrý tetikterine basa mán berildi.
«Biz Qazaqstan Parlamenti men Majarstan Memlekettik jınalysy arasynda qalyptasqan dostyq baılanysty joǵary baǵalaımyz jáne ony ári qaraı nyǵaıtýǵa múddelimiz. Parlamentaralyq yntymaqtastyǵymyz Eýropa Keńesiniń, Eýropadaǵy qaýipsizdik jáne yntymaqtastyq uıymynyń, sondaı-aq Parlamentaralyq Odaqtyń Parlamenttik Assambleıalary aıasynda da kópjaqty formatta damyp keledi. Majarstan baıqaýshy retinde qatysatyn Túrki memleketteriniń Parlamenttik Assambleıasy aıasyndaǵy ózara is-qımylymyz da erekshe mańyzǵa ıe», dedi Senat tóraǵasy.
Suhbattasýshylar Digital Bridge – 2025 Halyqaralyq tehnologııalyq forýmynyń kún tártibine – aqparattyq tehnologııalar, sıfrlandyrý jáne jasandy ıntellekt salasyndaǵy jańa tásilderge erekshe nazar aýdaryp, aldaǵy yntymaqtastyqtyń, onyń ishinde bilim berý salasyndaǵy birlesken is-qımyldyń basymdyqtaryn belgiledi.
Sonymen qatar kezdesýde saýda-ekonomıkalyq, ınvestısııalyq yntymaqtastyqqa, mádenı-gýmanıtarlyq baılanystardy arttyrýǵa qatysty máseleler talqylanyp, túrli salada birlesken jobalardy iske asyrý barysy sóz boldy. Taraptar aýyl sharýashylyǵy, tamaq ónerkásibi, mashına jasaý, kólik, energetıka, ınfraqurylym baǵyttaryn damytý jolyndaǵy Qazaqstan – Majarstan ınvestısııalyq qorynyń qyzmeti jóninde pikir almasty.
M.Áshimbaev rýhanı dıplomatııany damytýdyń mańyzyna toqtalyp, Álemdik jáne dástúrli dinder kóshbasshylary seziniń maqsattaryna qol jetkizýge qosqan eleýli úlesi men kórsetken belsendi qoldaýy úshin majar tarapyna rızashylyq bildirdi.
О́z kezeginde T.Shýıok bizdiń elge 30 jyl jalǵasyp kele jatqan jan-jaqty yntymaqtastyq úshin alǵys aıtyp, Qazaqstan men Majarstannyń kóptegen salada múddesi men ustanymy uqsas ekenin tilge tıek etti. Sondaı-aq ol baýyrlas elder arasyndaǵy yntymaqtastyqty odan ári nyǵaıtýǵa beıil ekenin jetkizdi.
