Bedeli bıik Halyqaralyq vokalıster konkýrsynyń jeńimpazdary Jambyl atyndaǵy Qazaq memlekettik fılarmonııasynda marapattaldy.
Opera óneriniń jeńimpazy ataný úshin Qazaqstan, Armenııa, Reseı, О́zbekstan, Qyrǵyzstan, Mońǵolııa, Italııada jumys isteıtin Ýkraına men Qazaqstannyń 52 oryndaýshysy talant jarystyrdy. Aqtyq synǵa ótken 17 ánshiniń ónerin álemdik opera maıtalmandarynan quralǵan halyqaralyq qazylar alqasy baǵalady.
Opera merekesi ispetti baıqaýda qazylar alqasynyń tóraıymy KSRO men Qazaqstannyń halyq ártisi, Sosıalıstik Eńbek Eri, akademık Bıbigúl Ahmetqyzy Tólegenova uıymdastyrýshylarǵa, demeýshiler men barsha qatysýshylarǵa shynaıy alǵysyn bildire otyryp, jeńimpazdyń atyn ózi jarııalady.
Bıylǵy jyldyń bas júldesin (Gran-prı) Máskeýden kelgen Sofıa Sakanııa ıelendi.
Jıyrma jastaǵy ánshi Baqytjan Baıqadamulynyń «Súıgen sáýlem» ánin náshine keltire oryndaýymen kórermenderdiń kózine tústi.
«Aýqymy bıik baıqaýda jeńiske jetkenime qýanyshtymyn! Shyny kerek, jeńimpaz atanamyn dep oılaǵan joqpyn. О́ıtkeni, básekeniń bási joǵary edi. Bul konkrýsqa katysýdyń ózi men úshin ári synaq, ári baq boldy. Bıbigúl Ahmetqyzy – ańyz adam. Ony óz kózimmen kórýdiń ózi – úlken baqyt. Álbette, oǵan qosa halyqaralyq baıqaýlar orasan tájirıbe beredi, orkestrmen jumys isteý, buryn-sońdy bastan ótkermegen áserler men kútpegen jeńis ákeldi. Bul baıqaý maǵan úlken mektepten ótkendeı áser qaldyrdy», dedi Sofıa.
Sonymen halyqaralyq opera óneriniń dodasyndaǵy I orynǵa Álıhan Beısekov (Almaty), Ekaterına Svırıdova (Máskeý) men Mýnhtývshın Horolgorav (Ulan-Batyr) laıyqty dep tanyldy. II oryn – Bekulan Erbolatulyna (Astana), Dilnaz Omarhanova (Astana) men Sevastıan Martynıýkqa (Krasnoıarsk) berildi. III oryndy Jandarbek Erkinbaev (Almaty), Hadıcha Imamnazarova (Tashkent) ıelendi.
Jas talanttardyń ishinen Ázıza Ábdreıim (Almaty), Bogdan Shevchenko (Atyraý), Arýjan Jalǵasova (Almaty), Arýjan Toqtaǵan (Almaty), Arýjan Alpysbaeva (Almaty), Atahan Aıbekýýlý (Bishkek), Hýrsandbek Atamýratov (Nókis), Alekseı Iýrkovskıı (Sankt-Peterbýrg) dıplomant atandy.
Qazaqstan kompozıtorlarynyń Bıbigúl Tólegenova repertýaryndaǵy shyǵarmasyn úzdik oryndaǵany úshin taǵy da Sofıa Sakanııa men pıterlik Alekseı Iýrkovskıı arnaýly syılyqty alyp ketti. Qatysýshy eldiń halyq ánin úzdik shyrqaǵany úshin Mýnhtývshın Horolgorav (Mońǵolııa) men úzdik konsertmeısterler retinde Larısa Shalabaeva men Marına Altýhova marapattaldy.
Gala-konsertte qazaqtyń, álemdik klassıkalyq áıgili shyǵarmalar oryndalyp, bulbul daýys ıelerin E.Ahmedıarovtiń dırıjerdik etýimen QR T.Ábdrashev atyndaǵy Memlekettik sımfonııalyq orkestri súıemeldedi.
Syıaqy qoryna keletin bolsaq, Gran-prı ıegerine – 5 400 000 teńge men laýreat ataǵy buıyrdy. I orynǵa – 2 700 000 teńge, II orynǵa – 1 500 000 teńge, III orynǵa – 1 200 000 teńge men laýreat ataqtary berildi.
Fınaldyq týrǵa deıin jetip, biraq laýreat ataǵyn almaǵan árbir qatysýshy dıplomdarǵa qosa, 350 000 teńge kólemindegi kótermeleý syıaqysymen marapattalyp, qurmetten qur alaqan qalǵan joq.
