Al ǵaryshqa ushqan tuńǵysh áıel týrıst túbi Irannan shyqqan Anýshe Ansarı atty amerıkalyq kásipker edi. Ol da 2006 jyly 18 qyrkúıekte reseılik «Soıýz TMA-9» kemesimen kóterilip, Halyqaralyq ǵarysh stansasynda 8 kún qonaqtaǵan.
Derekterdi qaıta qaýzaý sebebimiz, aldaǵy kúnderi otandasymyz Danna Qaraǵusova «Blue Origin» kompanııasynyń NS-36 zertteý mıssııasynyń quramynda ǵaryshqa attanǵaly otyr. Sóıtip 8 qazanda ol Qazaqstannan shyqqan alǵashqy ǵaryshtyq týrıst atanbaqshy.
Elimizdi ǵaryshpen ushtastyratyn tarıhı baılanystar jetkilikti desek te, Dannanyń bul sapary – erekshe mánge ıe. Adamzat balasynyń jeti qat kókke kóterilýine «batasyn bergen» Baıqońyrdan otandasymyz tuńǵysh týrıst retinde ǵaryshqa jol tartqaly otyr.
Otandasymyzdyń ózine keletin bolsaq, ol medıa, ıvent pen dıstrıbýsııa salasynda 25 jyldan astam tájirıbe jınaǵan maman. Eldegi eń iri medıa jáne ıvent-holdıng – «First Media Group»-tyń negizin qalaýshylardyń biri. Danna – tek vızıoner ǵana emes, sonymen qatar eń batyl ıdeıalardy júzege asyra biletin tájirıbeli maman retinde de tanylǵan.
Búginde otandasymyz ózin-ózi retteý salasyndaǵy halyqaralyq IT-jobasynyń negizin qalaýshylardyń biri retinde erekshelenedi. Osynaý ǵarysh sapary onyń zertteý jumystarynyń bir parasy ári jumys jobalary aıasynda óz komandasy ázirlep jatqan tehnologııalardy jeke synap kóredi.
«Adamzattyń keleshegi ǵaryshpen tikeleı baılanysty. Biz jańa kókjıekterdi ıgere otyryp, tehnologııalardy da damytyp, óz múmkindikterimizdi keńeıte túsemiz. Men úshin bul sapar – jyldar boıy jınaǵan tájirıbem men armanymnyń bir bólshegi ári zertteý jobasynyń mańyzdy kezeńi», deıdi Danna Qaraǵusova.
ALMATY
