Petropavlda bıyl kombaın shyǵarylady

PETROPAVL. 8 mamyr.  “Samuryq-Qazyna-Invest”, “Qazıntertehservıs” JShS-leriniń jáne Fınlıandııanyń “Sampo Rosenlew Ltd”, Polshanyń “Pronar SP.z.o.o.” kompanııalarynyń ókilderi byltyr  Qyzyljar óńirinde bolǵan jumys saparynda  aýyl sharýashylyǵy jáne kommýnaldyq tehnıkalar shyǵaratyn birlesken kásiporyn ashý jóninde oblystyq ákimdikpen mámilege kelgen bolatyn.  Osy kelisimge oraı qurylǵan “QazTehMash” kásipornyna 1,9 mıllıard teńge ınvestısııa tartý josparlanǵan. Bul týraly ındýstrııalyq-ınnovasııalyq damý basqarmasynyń basshylyǵy habarlady. «QazTehMash» JShS-i burynǵy shaǵyn lıtrajdy qozǵaltqyshtar zaýyty ǵımaratyna ornalasyp, óndiris oryn jasaqtaýǵa kirisken. Onyń dırektory Sábıt Shákenovtyń aıtýynsha, serpindi joba ındýstrııalyq-ınnovasııalyq damý memlekettik baǵdarlamasynyń ekinshi besjyldyǵynyń Indýstrııalandyrý kartasyna engizilgen.  Búginde jalpy aýmaǵy 7 myń sharshy metr bolatyn qurastyrý sehy 3 jeli ornatýǵa ázir.  Qajetti jabdyqtar men qondyrǵylar shetelden jetkizilýde. Kombaın qurastyrýǵa basshylyq jasaıtyn 14 maman Fınlıandııanyń “Sampo Rosenlew Ltd”, Polshanyń “Pronar SP.z.o.o.” kompanııalarynda oqyp, tájirıbeden ótken. Alǵashqy kezde osy kompanııalardyń ınjenerleri seriktestik mamandaryn ozyq tehnologııalardyń qyr-syryna úıretetin bolady. «Innovasııalyq jobanyń birinshi kezeginde daıyn bólshekterden kombaındar qurastyrýmen aınalysyp, otandyq úlesti arttyrýǵa birtindep kóshemiz. Zaýyt tolyq qýatynda jumys istegen kezde jylyna 400 kombaın, 500 traktor, 1200 kommýnaldyq tehnıka shyǵaratyn bolamyz.  168 adam jumyspen qamtylady.  Nesıeniń syıaqy stavkasy “Bıznestiń jol kartasy – 2020” memlekettik baǵdarlamasy aıasynda qarjylandyrylady. Alǵashqy kombaındar bıyl shyǵarylady», deıdi Sábıt Shákenuly. О́mir Esqalı. Derek: ındýstrııaldyq-ınnovasııalyq damý basqarmasy. Sýret: egemen.kz