Toı qonaqtary Jambyl aýylyndaǵy Jambyl Jabaevtyń ádebı-memorıaldyq mýzeıine atbasyn buryp, jyr alyby Jákeń men kúı atasy Nurǵısa rýhyna taǵzym etip, gúl shoqtaryn qoıdy.
Sýyqtóbe jazyǵyndaǵy Kókbastaý aýylynda ótken dúbirli toıda 40-tan astam aqboz úı tigilip, dalanyń sánin, merekeniń mánin arttyrdy. Ulttyq qolóner buıymdarynan kórme uıymdastyrylyp, sporttyq jarystar ótti. Almaty oblysynyń ákimi Marat Sultanǵazıev jıylǵan jurtty mereıtoımen quttyqtady.
«Nurǵısa Tilendıev – halqymyzdyń rýhanı qazynasyn baıytqan dara tulǵa. Onyń «Otyrar sazy» orkestri – qazaq mýzykasynyń altyn dińgegi. Al ánderi men kúıleri – ulttyń rýhanı aınasy. Bul mereıtoı tek óner merekesi ǵana emes, ulttyq rýhty jańǵyrtqan erekshe sát», dedi óńir basshysy.
Aqyn jáne dramatýrg, Memlekettik syılyqtyń laýreaty Nurlan Orazalın, qoǵam qaıratkeri Serik Úmbetov te uly kúıshiniń ómiri men óneri týraly estelikterimen bólisti.
Mereıtoıǵa jıylǵan qaýym Nurǵısa Tilendıev atyndaǵy «Otyrar sazy» memlekettik akademııalyq halyq aspaptary orkestri men Almaty oblysynyń ónerpazdary qoıǵan mýzykalyq baǵdarlamany tamashalady. Qyzy Dinzýhra Tilendıeva dırıjerligimen uly kompozıtordyń «О́z elim», «Aqqý», «Mahambet», «Ata tolǵaýy», «Altyn dán», «Jas qazaq» syndy týyndylary tyńdarman júregin terbep, aspan kóginde qalyqtady.
Merekelik is-shara rýhymyzdy aspandatqan at jarysymen aıaqtaldy. Ony tamashalaýǵa 15 myńǵa jýyq adam jınaldy. Kókbastaý tórindegi alamanda áıgili júırik Jumyrtuıaq top jardy.
Top báıgede Abaı oblysynyń «Qalqamany», qunan báıgede Jambyl oblysynyń «Boıtumar» atty sáıgúligi aldyna qara salmady. At ıeleri báıgege tigilgen temir tulparlardyń kiltin ıelendi.
Almaty oblysy
