Arshaly aýdanynda jumys oryndary ashylyp jatyr

KО́KShETAÝ. 8 mamyr. Aglomerasııalyq aımaqtaǵy Arshaly aýdanynda jumyssyzdyq deńgeıi azaıyp keledi. Bul týraly egemen.kz tilshisi habarlady. О́tken jyldyń qorytyndysy boıynsha aýdanda jumyspen qamtylǵandardyń kórsetkishi 90 paıyzdy qurap, 2013 jylmen salystyrǵanda 3,8 paıyzǵa artty. Al, bıylǵy jyldyń basynan beri óńirde birde bir adam jumyssyz retinde resmı tirkelmegen. «О́tken jyly 412 adam jumysqa ornalastyrý jóninde kómek surap júgingen edi. Esesine 415 jańa jumys ornyn qura bildik (270-i kásipkerlik, 132-si aýyl sharýshylyǵy salasynda). Halyqty eńbekpen qamtýda «Jumyspen qamtýdyń jol kartasy-2020» memlekettik baǵdarlamasynyń róli zor. Atalǵan baǵdarlama boıynsha barlyǵy 103 jańa jumys orny ashyldy», deıdi aýdandyq jumyspen qamtý bóliminiń basshysy Gúlzada Jekebaeva. Memlekettik baǵdarlamany durys úılestire bilýdiń arqasynda jurtshylyqty jumyspen qamtý belsendi sıpat alýda. Máselen, baǵdarlamanyń birinshi baǵyty boıynsha 35,3 mıllıon teńgege jastar ortalyǵy ǵımaratyna kúrdeli jóndeý jumystary júrgizildi. Ekinshi baǵyty boıynsha 19 adam óz kásibin ashý úshin barlyǵy 53 mıllıon teńgeniń shaǵyn nesıesine qol jetkizdi. Osynyń nátıjesinde 32 jańa jumys orny ashyldy. Shaǵyn nesıe alǵandardyń arasynda 3 toptaǵy  múgedek azamat bar eken. Al, úshinshi baǵyt boıynsha 46 adam áleýmettik jumys oryndaryna jiberilse, 24 adam jastar tájirıbesinen ótti. Sondaı-aq, 7 adam qaıta daıarlyqtan ótip, 3 adam kásibı bilimin shyńdaǵan. Qazirgi tańda aýdanda 214 kásiporyn jumys istep tur. Olardyń barlyǵymen ujymdyq kelisim-shart jasalǵan. Baqbergen Amalbek. Derek, sýret: egemen.kz