Match tek fýtbol jankúıerlerin ǵana emes, sheteldik týrısterdi de kóptep tartty. Qalaǵa 5 myńnan astam qonaq kelip, olardyń shyǵyndary shamamen 7,8 mln dollardy qurady.
Kazakh Tourism taratqan derekke sáıkes, 28-30 qyrkúıek aralyǵynda Almatydaǵy qonaqúı men hostelderde 5 221 sheteldik týrıst tirkelgen. Kompanııa sarapshylary olardyń basym bóligi arnaıy osy match úshin kelgenin aıtady. Jankúıerlerdiń geografııasyna nazar aýdarsaq, eń kóbi Qytaıdan kelgen. Bul elden 1 400-den astam adam Almatyǵa at basyn burǵan. Reseıden 969 jankúıer kelse, Úndistannan 365 adam, Ońtústik Koreıadan 249, О́zbekstannan 246 qonaq tirkeldi. Árqaısysy qalada birneshe kún bolyp, qonaqúıge ornalasty, meıramhanalarǵa bardy, kólik qyzmetin paıdalandy, oıyn-saýyq oryndaryna kirdi, saýda jasady.
Ekonomıkalyq turǵydan alǵanda, qalaǵa birshama kiris kergen. Mastercard dereginshe, bir týrıst ortasha eseppen 1 500 dollar jumsaǵan. Bul qarjynyń ishinde qonaqúı aqysy, tamaqtaný, transport, mádenı demalys pen dúken aralaý shyǵyndary bar. Osylaısha, Almaty qalasynda aınalymǵa túsken 7,8 mıllıon dollar shaǵyn jáne orta bıznestiń damýyna, qyzmet kórsetý sapasynyń artýyna ári qosymsha jumys oryndarynyń jandanýyna yqpal etti.
Mundaı sharalardyń qala ekonomıkasyna áseri buryn da baıqalǵan. Mysaly, Almatyda ótken Djennıfer Lopestiń konsertine 27 myń kórermen jınalyp, onyń jalpy ekonomıkalyq áseri 10 mlrd teńgeni quraǵan edi. Sonyń ishinde 5 mlrd teńgeden astamy sheteldik týrısterdiń shyǵyny boldy.
