«Báıterek» ulttyq basqarýshy holdınginiń basqarýshy dırektory Álııa Murzaǵalıevanyń sózinshe, Prezıdent bul salanyń el ómirindegi orny men mańyzyn aıqyndaı otyryp, «aqyldy qala» konsepsııasyn keńinen engizý, ınfraqurylymdyq jobalardyń ashyqtyǵyn sıfrlyq formatta júrgizý, memleket pen jeke sektor arasyndaǵy seriktestikti kúsheıtý qajettigin erekshe atap ótti.
«Tapsyrmaǵa sáıkes, «Báıterek» ulttyq basqarýshy holdıngi 2025-2029 jyldarǵa arnalǵan «Energetıkalyq jáne kommýnaldyq sektorlardy jańǵyrtý» ulttyq jobasynyń qarjylyq operatory bolyp bekitildi. Holdıngtiń negizgi maqsaty – turǵyn úı-kommýnaldyq sharýashylyq júıesindegi jobalardy qarjylandyrýdyń biryńǵaı modelin qalyptastyrý jáne ony tıimdi úılestirý.
Jeke sektordaǵy tabıǵı monopolııa sýbektileri úshin qarjylandyrý Damý banki arqyly júrip jatyr. Bul jumysqa halyqaralyq qarjy uıymdary men ekinshi deńgeıli bankter tartylǵan. Al kommýnaldyq jáne kvazımemlekettik sektorda Qazaqstan turǵyn úı kompanııasy arqyly jergilikti atqarýshy organdardyń oblıgasııalaryn satyp alý tetigi qoldanylady», deıdi Álııa Murzaǵalıeva.
Mundaı tásil ınjenerlik jeliler men jabdyqtardy tez arada jańartýǵa jol ashady, sonymen qatar qyzmet sapasyna qoıylatyn talaptar esh ózgerissiz saqtalady. Ulttyq joba aıasynda arnaıy elektrondyq platforma ázirlenip jatyr. Bul júıe tabıǵı monopolııa sýbektileriniń ótinimderin qabyldaýdan bastap, merdigerlerdi tańdaý, satyp alý rásimderin júrgizý jáne kelisimsharttardy rásimdeýge deıingi barlyq úderisti tolyq onlaın formatta biriktiredi. Platforma tolyq iske qosylǵanǵa deıin ýaqytsha onlaın bgov.kz portalynda jumys istep tur. Búgingi kúnge deıin jalpy somasy 182,8 mlrd teńgeni quraıtyn 28 joba tirkelip, olar «Báıterek» holdınginiń enshiles uıymdaryna qaraýǵa jiberildi.
«Qarjylandyrýdyń alǵashqy nátıjeleri de kórinis bere bastady. Qazaqstan turǵyn úı kompanııasy Qaraǵandy, Pavlodar, Batys Qazaqstan jáne Soltústik Qazaqstan oblystary ákimdikteriniń oblıgasııalaryn 22,5 mlrd teńgege satyp aldy. Bul qarajat jylý, sý, elektrmen jabdyqtaý jáne sýmen tazartý boıynsha on nysandy jańǵyrtýǵa baǵyttalǵan. Osy jobalar júzege asqanda, aımaqtardaǵy júzdegen myń turǵynnyń turmys sapasy jaqsarady, jelilerdegi apattar azaıady jáne kommýnaldyq qyzmetterdiń senimdiligi artady», deıdi sarapshy.
Sonymen qatar memleket pen bıznes arasyndaǵy seriktestik te jańa deńgeıge shyǵyp otyr. Jeke sektordyń qatysýy turǵyn úı-kommýnaldyq sharýashylyq salasyndaǵy iri jobalardy júzege asyrý qarqynyn kúsheıtedi. Investorlar úshin qolaıly jaǵdaı jasalyp, uzaq merzimdi áriptestik ornatylady.
