Onyń aıtýynsha, endi bankter jeke aýdarymdarǵa emes, operasııalardyń jalpy baılanysyna qarap sheshim qabyldaıdy.
«Bir ǵana aqsha aýdarymy kúdik týdyrmaýy múmkin. Biraq osyndaı birneshe ózara baılanysy bar operasııalar men qatysy bar tulǵalar tizbegi kúmándi bolýy yqtımal. Mundaı jaǵdaıda bankter men qarjy uıymdary bul aqparatty agenttikke habarlaýǵa mindetti», dedi Elemesov.
Maqsat – árbir azamattyń jeke qarjysyna aralasý emes, júıeli zańsyz shemalardy der kezinde anyqtaý.
«Biz ár tıyndy sanamaımyz. Mańyzdysy, belgili bir maqsatta jıi qaıtalanyp, ózara baılanysyp turatyn kúmándi áreketterdi kórý. Keıde mundaı shemalar syrttaı qaraǵanda zańdy bolyp kórinedi, biraq ishki logıkasy kúdik týǵyzady», dep túsindirdi ol.
Qazir agenttik kúmándi operasııalardy anyqtaıtyn naqty krıterııler ázirlep jatyr. Bul talaptar jaqyn arada Qarjy monıtorıngi agenttigi tóraǵasynyń buıryǵymen bekitiledi.
«Onda qandaı operasııalar kúdik týǵyzatyny naqty kórsetiledi. Mysaly, bir shottan ártúrli adamdarǵa jıi iri soma aýdarý nemese kerisinshe, birneshe adamnan bir shotqa qysqa ýaqytta aqsha túsýi sııaqty jaǵdaılar avtomatty túrde tekseriledi», dedi Elemesov.
Sondaı-aq ol bankterge azamattardyń jeke derekter bazasyna kirýdiń qajeti joq ekenin atap ótti.
«Bank óz klıentteriniń arasyndaǵy operasııalardy ǵana taldaıdy. Sol arqyly zańda kórsetilgen ólshemderge saı, kúmándi me, joq pa – sony anyqtaıdy. Bizge eń bastysy, ashyq esep pen zańdy túsinikteme. Aqshanyń qaıdan kelip, qaıda ketip jatqanyn anyq kórý mańyzdy», dedi vedomstvo ókili.
