PETROPAVL. 8 mamyr. Qazaq kúresinen «Qyzyljar barysy» ataǵyn ıelený úshin Petropavl qalasy men aýdandardan úkilep qosqan eń myqtylary kúsh synasyp, jeńimpazdar men júldegerlerge oblys ákiminiń arnaıy júldeleri tabys etildi. Bul týraly oblystyq dene shynyqtyrý jáne sport basqarmasynyń baspasóz qyzmeti habarlady.
Irikteý týrynyń eki kezeńi boıynsha bir myńǵa jýyq balýandardyń arasynan aqtyq jarysqa 32-i sýyrylyp shyqty. Beldesýler á degennen tartysqa toly boldy. Boz kilemge birinshi bolyp petropavldyq Erik Quljanov pen aqqaıyńdyq Nursultan Ábishev kóterildi. Salmaqtary qaraılas bolǵanymen, Erik upaı sanymen jeńiske jetti. Ýálıhanovtyq Altynbek Aýsaǵıtov petropavldyq Manas Abýovty tize búktirdi.
4 saǵatqa sozylǵan beldesýde aqtyq jarysqa joldama alǵan balýandardyń aty-jónderi belgili boldy. Petropavldyq Dáýren Eslámov shalaqyndyq Qaıyrbek Batyrhandy utyp, úshinshi orynǵa taban tiredi. Taǵy bir petropavldyq Rústem Jumaev Jambyl aýdanynyń ókili Tólegen Jetpisbaevty taza jeńip, «Qyzyljar barysy» ataǵyn úshinshi ret qanjyǵasyna baılady.
О́mir Esqalı.
Derek, sýret: Soltústik Qazaqstan oblystyq dene shynyqtyrý jáne sport basqarmasynyń baspasóz qyzmeti.
