Atalǵan rásim barysynda elimizdiń pavılony «Theme Development» («Kórme taqyrybyn ashý») negizgi atalymy boıynsha «S» sanatyndaǵy shaǵyn pavılondar arasynda 1-oryndy ıelendi. Bul sanatqa 90-nan astam el kirdi. Bizdiń ekspozısııa kórmeniń basty taqyrybyn mazmundy jáne erekshe túrde ashqany úshin joǵary baǵaǵa ıe boldy.
Kórme bastalǵan kúnnen bastap Qazaqstan pavılony japondyqtar men sheteldik týrıster arasynda úlken qyzyǵýshylyq týdyrdy. Pavılon elimizdiń mádenıeti, dástúri men tarıhy, ınvestısııalyq, ekonomıkalyq jáne ınnovasııalyq damýy, sondaı-aq sıfrlandyrý, tehnologııa jáne turaqty damý salalaryndaǵy mazmundy ári tartymdy ekspozısııasymen erekshelendi. Osy oraıda halyqaralyq jáne japon buqaralyq aqparat quraldary pavılon týraly birqatar maqala jarııalady.
Kórme barysynda pavılon yntymaqtastyq pen ózara tájirıbe almasýdyń mańyzdy alańyna aınalyp, elimizdiń jahandyq qoǵamdastyqtaǵy ashyq ári senimdi seriktes retindegi mártebesin nyǵaıtty. Pavılon aıasynda 9 iskerlik jáne mádenı is-shara uıymdastyryldy. Eń iri oqıǵalardyń biri – Qazaqstannyń Ulttyq kúni, ol 2025 jylǵy 10 tamyzdaǵy uly oıshyl Abaı Qunanbaıulynyń 180 jyldyǵyna oraı ótti. Sol kúni «EXPO National Day Hall» alańynda Qazaqstan Respýblıkasynyń týy kóterilip, aýqymdy merekelik konserttik baǵdarlama uıymdastyryldy. Sharaǵa shamamen 3 000 kórermen qatysty.
Pavılon «О́mirdi biriktirý» klasterinde ornalasyp, shamamen 1,5 mln adamdy qabyldady. Olardyń qatarynda resmı delegasııalar, halyqaralyq uıymdar, dıplomatııalyq mıssııalar, bıznes, medıa jáne shyǵarmashylyq qaýym ókilderi boldy.
Pavılonǵa Halyqaralyq kórmeler bıýrosynyń (BIE) Bas hatshysy Dımıtrı Kerkentzes resmı saparmen kelip, onyń uıymdastyrylý deńgeıin, mazmunyn jáne ekspozısııalyq sheshimin joǵary baǵalady.
Dúnıejúzilik «EXPO 2025 Osaka» kórmesi 2025 jylǵy 13 sáýir men 13 qazan aralyǵynda ótti. Is-sharaǵa 160 memleket pen 9 halyqaralyq uıym qatysty, al jalpy kelýshiler sany 28 mıllıonǵa jýyqtady. Alty aı boıy Iýmeshıma araly «Bizdiń ómirimiz úshin bolashaq qoǵamyn qurý» taqyrybyndaǵy jahandyq dıalogtiń basty alańyna aınaldy.
«QazExpoCongress» UK» AQ baspasóz qyzmeti
