QOSTANAI. 8 mamyr. Rýdnyıdyń «BAS» jastar teatry daıyndaǵan Lev Protalınniń «Taǵdyrly sátke alǵys aıtyńdar» degen spektaklin «Gornıak» oıyn-saýyq ortalyǵynda qoıdy. Bul týraly egemen.kz tilshisi habarlady.
Jastar teatry bul qoıylymǵa ótken jyldyń qarasha aıynan bastap daıyndalypty. Teatrdyń rejısseri Natalıa Kýdrıavseva spektakldi shyǵarý kásibı emes teatrǵa ońaıǵa túspegenin aıtty.
Natalıa Kýdrıavseva: «Pesa kúrdeli, mátini uzaq. Dıalogtar kúrdeli, kórermenge aýyr jyldardyń sýretin jetkizý úshin onyń ár sózin belgili maqammen jetkizý kerek boldy» dedi.
Spektaklde oınaǵan akterlerdiń birazy buryn teatr jumysyna qatysyp, biraz rolderdi oaınaǵan, al kópshiligi sahnaǵa alǵash shyqty. Bul da belgili qıyndyq týǵyzdy. Olar spektakl shynaıy shyǵý úshin soǵys taqyrybyna arnalǵan kınolardy kórip, kitaptardy oqydy, soǵys jyldarynyń mýzykalyq shyǵarmalaryn tyńdady.
Aktrısa Lıýbov Berdygına: «Meniń rolim – hırýrg, soǵys ábden silkilegen polkovnık áıel Sokolova boldy. Onyń soǵysta sanıtarka bolyp istegen qyzy qaza tapty. О́te kúrdeli rol, buryn maǵan mundaı rol tap kelgen emes. Onyń aıtatyn birneshe aýyr sózderi boldy, sony shynaıy jetkizý úshin kóp jumys istedim», dedi.
Spektakl sıýjeti 1945 jyly Shyǵys Prýssııadaǵy keńes áskerleri men tutqynǵa túsken vermaht sodattary emdelgen áskerı gospıtalde ótedi. Sıýjet jelisi tutqyn ofıser Fon Gıýnter men ulty evreı hırýrg Sazonev tóńireginde órbıdi. Eshteńege qaramaı, hırýrg óziniń pasıentin emdeıdi. Spektakl bastalarda kórermen sahnadaǵy «Spektakl soǵysqa qatysyp, Adam qalpyn saqtap qalǵandarǵa arnalady» degen jazýdy oqydy. Qoıylym aıaqtalǵanda bul jazýdyń mán-mańyzyn túsinedi. Spektakldiń shyǵýyna qamqorlyq jáne demeýshilik jasaǵan Rýdnyı jastar ortalyǵynyń jetekshisi Maksım Frolov mundaı spektakldiń tek merekede ǵana emes, únemi júrý kerektigin, óıtkeni jastardyń tarıhty umytpaýy tıistigin aıtty.
Maksım Frolov: «Spektakldi beı-jaı qalyppen kórý múmkin emes, tamaǵyńa óksik tyǵylady. Bizdiń qaladaǵy BAS jastar teatrynyń izdenisine rızamyz. Onan ósip shyqqan akterler qazir Qazaqstan men Reseıdiń úlken sahnalarynda júr», dedi.
Názıra Járimbetova.
Derek, sýret: ng.kz
