Foto: Úkimettiń baspasóz qyzmeti
Jıynda Ishki ister, Densaýlyq saqtaý, Oqý-aǵartý, Mádenıet jáne aqparat mınıstrleri Memleket basshysynyń Qaýipsizdik keńesi otyrysynda bergen tapsyrmalarynyń oryndalý barysy týraly baıandady.
Premer-mınıstr nashaqorlyq pen esirtki qylmysynyń ulttyq qaýipsizdikke tóndiretin qateri zor ekenin atap ótip, bul baǵyttaǵy jumystardy júıeli jáne vedomstvoaralyq tásildi talap etetin ózekti másele retinde qala beretinin aıtty.
«Memleket basshysy jarııalaǵan «Zań men tártip» qaǵıdatyn qamtamasyz etý – qoǵamnyń ornyqty damýynyń, quqyqtyq tártipti nyǵaıtýdyń, azamattar quqyqtaryn qorǵaýdyń mańyzdy sharty. Memlekettik organdar nashaqorlyqtyń aldyn alý jáne esirtki qylmysyna qarsy is-qımyl boıynsha aýqymdy jumystar júrgizýde. Birqatar zań qabyldanyp, salalyq ınstıtýttar men ınfraqurylymdar qurylýda, bul saladaǵy halyqaralyq yntymaqtastyq keńeıip keledi. Atalǵan jumys qarqynyn tómendýge bolmaıdy, ol jalpyulttyq sıpatqa ıe bolýy kerek», dedi Oljas Bektenov.
Qazirgi ýaqytta 2026–2028 jyldarǵa arnalǵan nashaqorlyq pen esirtki bıznesine qarsy kúrestiń keshendi jospary ázirlenip jatyr. Bul qujatta jastar, ásirese oqymaıtyn jáne jumys istemeıtin NEET sanatyndaǵy toptarmen jumysqa erekshe nazar aýdarylady. Sondaı-aq buqaralyq sport pen shyǵarmashylyq bastamalardy paıdalaný arqyly aldyn alý tetikteri kúsheıtilmek.
Ishki ister mınıstri Erjan Sádenov esirtkiniń ınternet-saýdasyna qarsy is-qımyl jónindegi jumystyń jandanǵany týraly baıandady. «Kıbernadzor» júıesiniń arqasynda anyqtalǵan jáne buǵattalǵan saıttar sany 11 esege ósip, 26,5 myńnan astam ınternet-resýrs jabylǵan. Sonymen qatar, 35 myńnan astam banktik shot buǵattalyp, 4 myńnan astam adam qylmystyq jaýapkershilikke tartylǵan.
Premer-mınıstr IIM-ge jyl sońyna deıin óńirlerdegi ákimdikterdiń esirtkige qatysty quqyq buzýshylyqtardyń aldyn alý qyzmetin baǵalaıtyn reıtıng ázirleýdi tapsyrdy. Densaýlyq saqtaý mınıstrligi esirtkige táýeldi adamdardy emdeý men ońaltýdy jetildirý baǵytynda jumys júrgizip jatyr, al narkologııa salasyndaǵy klınıkalyq hattamalar qaıta qaralǵan. Sondaı-aq emdeý sapasynyń halyqaralyq baǵdarlamasy engizilip jatyr.
«IIM usynysy sheńberinde Mádenıet jáne aqparat mınıstrligimen, otandyq óndirýshilermen birlesip, halyqty esirtkige arnalǵan qoljetimdi ekspress-testermen, onyń ishinde áleýmettik osal toptardy tegin qamtamasyz etý máselesin pysyqtaý tapsyryldy. Bul bastapqy tutyný faktilerin anyqtaıtyn aldyn alý sharasy bolady. Sondaı-aq bir aı ishinde jekemenshik narkologııalyq ońaltý ortalyqtarynyń qyzmetin retteıtin quqyqtyq tásilderdi ázirlep shyǵarý talap etiledi.Bilim berý salasy tarapynan profılaktıkalyq jumystar júrgizilýde: tárbıelik fýnksııalardy pedagog-psıhologtar men áleýmettik pedagogtardy qosa alǵanda, 360 myń pedagog júzege asyrýda, oqýshylar qaýipsizdik sabaqtarymen 100% qamtylǵan, ata-analardy pedagogıkalyq qoldaýdyń 6,8 myń ortalyǵy jumys isteıdi. Sondaı-aq tıisti ádistemelik usynymdar ázirlendi», delingen habarlamada.
Mádenıet jáne aqparat mınıstri Aıda Balaeva esirtkige qarsy nasıhat boıynsha júrgizilip jatqan jumystar týraly baıandady. Oljas Bektenov profılaktıkalyq jumysta nasıhattaýdyń zamanaýı nysandary men ádisterin qoldaný qajettiligine nazar aýdardy. Tanymal onlaın-platformalarda, kınoteatrlarda, qoǵamdyq kólikterde jáne azamattardyń jappaı jınalatyn oryndarynda áleýmettik jarnamany ornalastyrýdyń mańyzdylyǵy atap ótildi. Osyny eskere otyryp, «Zań men tártip» tujyrymdamasyn júzege asyrý jónindegi aqparattyq jumysty túzetý tapsyryldy.
Budan bólek, Mádenıet jáne aqparat, Jasandy ıntellekt mınıstrlikteri Ulttyq qaýipsizdik komıtetimen birlesip, maqsatty jarnama men esirtki saıttaryn anyqtaýǵa jáne avtomatty túrde buǵattaýǵa belsendi túrde qosylýy kerek.
Sıntetıkalyq esirtkiniń jańa túrlerin anyqtaý úshin Ádilet mınıstrligi Sot saraptamasy organdaryn zamanaýı jabdyqtarmen jaraqtandyrý, sarapshylardy irikteý jáne daıarlaý, sondaı-aq rásimdi jetildirý jáne saraptama júrgizý ýaqytyn ońtaılandyrý qajet.
Shekaradaǵy ótkizý pýnktteri qazirgi zamanǵy tekserý quraldarymen, shekaralyq baqylaý men radıomonıtorıngtiń tehnıkalyq quraldarymen qamtamasyz etiletin bolady.
О́ńirlerdiń ákimderine nashaqorlyqqa qarsy is-qımyl jónindegi oblystyq shtabtardy basqarý jáne osy jyldyń qazan aıynyń sońyna deıin jergilikti jaǵdaılar men bıýdjetterdiń múmkindikterin eskere otyryp, nashaqorlyqqa qarsy is-qımyl jónindegi naqty sharalardy ázirleý tapsyryldy.
Otyrys qorytyndysy boıynsha respýblıkalyq shtabtyń 2026 jylǵa arnalǵan jumys jospary maquldandy. Premer-mınıstr barlyq usynystar men bastamalar ázirlenip jatqan keshendi jospardyń negizine engiziletinin atap ótti.
