Foto: Úkimettiń baspasóz qyzmeti
Jańa qala Almaty oblysynyń aýmaǵynda, mańyzdy kólik dálizderiniń torabynda ornalasqan. Jalpy aýdany 88 myń gektardy qamtıdy. Qala tolyqtaı Arnaıy ekonomıkalyq aımaqtyń quramyna engizilgen. Munda korporatıvtik tabys salyǵynan, jer jáne múlik salyǵynan bosatý, sondaı-aq qala aýmaǵynda satylatyn taýarlarǵa nóldik qosymsha qun salyǵyn qoldaný sekildi aýqymdy jeńildikter qarastyrylǵan.
Esterińizge sala keteıik, qyrkúıek aıynda Memleket basshysynyń arnaıy Jarlyǵymen Alataý qalasyna damý qarqyny ozyq qala degen mártebe berilip, onyń strategııalyq basqarý tetigi Úkimet qaramaǵyna ótti. Al Premer-mınıstrdiń tóraǵalyǵymen qurylǵan Damytý keńesi jobanyń negizgi sheshim qabyldaıtyn organy sanalady.
Qanat Bozymbaev óz sózinde Qazaqstan men Koreıa arasyndaǵy seriktestikke erekshe toqtalyp, elektronıka, jańartylatyn energııa kózderi, medısına, bilim berý jáne qalalyq servısterdi sıfrlandyrý baǵyttarynda birlesken jobalardy damytýǵa zor múmkindik bar ekenin atap ótti.
«Búginde Koreıanyń 800-den astam kompanııasy Qazaqstannyń barlyq óńirlerinde energetıka, qurylys, qarjy, densaýlyq saqtaý, avtokólik jáne joǵary tehnologııalar salalarynda tabysty jumys isteýde. Biz birlesken jobalardy keńeıtýge, Koreıanyń ónerkásiptik jáne energetıkalyq kompanııalaryn tartýǵa múddelimiz. О́zara tıimdi yntymaqtastyqqa ashyqpyz jáne sizderdi ulttyq Alatau City jobasyna qatysýǵa shaqyramyz», dedi ol.
Forým aıasynda Qazaqstan men Koreıa Respýblıkasynyń memlekettik jáne isker qurylymdary arasynda ózara túsinistik týraly birqatar memorandýmǵa qol qoıyldy. Memorandýmdarǵa kelesi taraptar: QR Energetıka mınıstrligi men GGGI (Global Green Growth Institute); QR Kólik mınıstrligi, Korea Airports Corporation (KAC) jáne AAAG; Almaty oblysynyń ákimdigi men RETD kompanııasy qol qoıdy.
Sonymen qatar QR Ǵylym jáne joǵary bilim mınıstrligi, Koreıanyń ǵylym jáne tehnologııalar ınstıtýty (KAIST) jáne Alatau City Bank arasynda Qazaqstanda jańa ýnıversıtet qurý jáne damytý salasynda yntymaqtastyq týraly memorandýmǵa qol qoıyldy.
Issapar barysynda Qanat Bozymbaev Koreıanyń memlekettik jáne isker top ókilderimen — Ulttyq jınalys depýtaty Pak Hon Gynmen, Ulttyq Assambleıa múshesi Men Son Gıýmen, Saýda, ónerkásip jáne energetıka mınıstri Kım Djýng Kvanmen, sondaı-aq KITA tóraǵasy Iýn Djın Sık jáne Young Business Leaders Network basshylyǵymen kezdesýler ótkizdi.
Taraptar ekijaqty ekonomıkalyq baılanystardyń turaqty damyp kele jatqanyn atap ótti. 2024 jyly Koreıa Respýblıkasy Qazaqstannyń negizgi saýda seriktesteri arasynda 10-orynǵa, al ınvestısııa kólemi boıynsha 3-orynǵa shyqqan. Kezdesýler nátıjesinde eki el ózara tıimdi yntymaqtastyqty tereńdetýge jáne jańa birlesken jobalardy iske asyrýǵa nıetti ekenin málimdedi.
