Bir kezderi dostarymen birge ishimdik ishken soń aqshasy taýsylǵan jas jigit jeńil jolmen paıda tabýǵa bel býyp, dúken tonaýǵa barǵan. Bul áreketiniń saldary aýyr boldy, sot úkimimen ol 4 jylǵa bas bostandyǵynan aıyryldy.
Qazir Evgenıı Qylmystyq-atqarý júıesi departamentiniń Qostanaı oblysy boıynsha mekemesinde jazasyn ótep jatyr. Ol óziniń ótkenine ókinip, jastarǵa oılanbaı jasaǵan áreket ómirdi túbegeıli ózgertip jiberetinin eskertedi.
«Bostandyqtyń qadirin ony joǵaltqanda ǵana túsinesiń. Bir sáttik sheshim, bir qate qadam – búkil ómirińdi buzýy múmkin. Erkindikti baǵalańyzdar, janyńyzdaǵy jaqyndaryńyzdy qadirleńizder», – deıdi Evgenıı.
Onyń aıtýynsha, túrmedegi ómir ár adamǵa úlken sabaq bolýy tıis. Qazir ol qateligin moıyndap, jazasyn óteý barysynda eńbekke jáne bilimge den qoıyp júr.
Qylmystyq-atqarý júıesi qyzmetkerleri mundaı kezdesýler men ashyq áńgimelerdiń jastar arasynda quqyqtyq sana men jaýapkershilikti arttyrýǵa sep bolatynyn atap ótedi.
