Kórme túrli býyn ókilderi arasyndaǵy shyǵarmashylyq úndestiktiń, rýhanı sabaqtastyqtyń jemisi. Joba aıasynda jas sýretshilerdiń shynaıy talpynysy men ustazdarynyń kórkemdik tereńdigi bir arnaǵa toǵysyp, kórermenge erekshe áser qaldyrady. Ekspozısııada túrli tehnıkada oryndalǵan 100-den astam týyndy usynyldy. Olardyń avtorlary — qalalyq, respýblıkalyq jáne halyqaralyq baıqaýlardyń júldegerleri atanǵan oqýshylar men olardyń kásibı tálimgerleri.
«Tumar-Art» qaýymdastyǵy uzaq jyldar boıy balalar men jasóspirimderdiń shyǵarmashylyǵyn damytýǵa baǵyttalǵan «Art-Flora», «Ǵalam palıtrasy», «Almaty — myń tústiń qalasy», «Atameken» syndy aýqymdy jobalardy tabysty júzege asyryp keledi. Qaýymdastyq quramyndaǵy pedagog-sýretshiler tek kásibı deńgeıdegi kórmelerge qatysyp qana qoımaı, jas býyndy tárbıeleý isine de eleýli ún qosyp júr. Olardyń shákirtteri túrli deńgeıdegi óner baıqaýlarynda úzdik nátıje kórsetip, qazaq beıneleý óneriniń bolashaǵyn jalǵastyrýda.
Kórme qonaqtary men qatysýshylar kórkem týyndylar arqyly kúz mezgiliniń ásemdigin, shabyt pen sezimge toly bolmysyn jańa qyrynan tanýǵa múmkindik aldy. «Kúzgi sımfonııa: balalar men tálimgerler» kórmesi — óner arqyly urpaqtar arasyndaǵy rýhanı baılanys pen shyǵarmashylyq sabaqtastyqty dáriptegen mańyzdy mádenı oqıǵa retinde este qaldy.
«Búgingi kórme — balalar shyǵarmashylyǵy men ustazdar eńbeginiń jarqyn nátıjesi. Biz osyndaı bastamalar arqyly óskeleń urpaqtyń ónerge degen qyzyǵýshylyǵyn oıatyp, olardyń shyǵarmashylyq áleýetin damytýǵa jol ashamyz. О́nerden órnek izdegen órenderdiń búgingi betalysy kóńilge úmit uıalatady» - deıdi Memlekettik Ortalyq mýzeıdiń Syrtqy baılanystar bóliminiń jetekshisi Anna Kýshenko.
Shara barysynda QR Memlekettik ortalyq mýzeıi atynan "Tumar-Art" sýretshi-pedagogtar qaýymdastyǵynyń dırektory Larısa Savankınaǵa balalar men jasóspirimderdiń kórkem shyǵarmashylyǵyn damytýǵa qosqan zor úlesi úshin alǵys hat tabystaldy.
Aıryqsha kórme qazan aıynyń sońyna deıin jalǵasady.
