Atalǵan zaýyt keleshekte Orta Azııadaǵy eń iri jańa býyndy «jasyl» metallýrgııalyq nysannnyń birine aınalmaq. Munda metaldyǵy 93%, quramyndaǵy temir úlesi 90%-dan joǵary ónim alý kózdelgen. Nátıjesinde Qazaqstan jahandyq bolat quıý naryǵynda básekege qabiletti ónimniń jańa túrin usynatyn bolady.
Jobany «Midrex» úderisi boıynsha temirdi tikeleı qalpyna keltirýdiń ozyq tehnologııalaryna súıene otyryp iske asyrý josparlanǵan. Mamandar atalǵan tehnologııa ekologııalyq turǵydan buǵan deıingi dástúrli domna óndirisinen anaǵurlym utymdy ekenin aıtady. Munda kokstyń ornyna tabıǵı gaz paıdalanylady. Zaýyt «SSKО́B» AQ óndirgen totyqqan temirkeni shekemtastaryn óńdep, bolashaq bolat quıý sehyna ystyq bırkettelgen ónim berip otyrady.
«Memleket basshysynyń Joldaýynda tereń óńdelgen jáne otandyq, halyqaralyq naryqta básekege qabiletti ónim óndirý – basym baǵyttyń biri ekeni aıtyldy. Búgin osy konsorsıýmmen jasalǵan kelisim shart – Qazaqstandaǵy metallýrgııa salasyn damytý men ondaǵy ERG-diń kóshbasshylyǵyn nyǵaıta túsetin strategııalyq qadam. Biz eksportqa jańa múmkindikter ashatyn, jańa jumys oryndaryn quryp, kásibı bilikti adam kapıtalyna sep bolar joǵary tehnologııalyq óndiris quryp jatyrmyz», dedi ERG Dırektorlar keńesiniń tóraǵasy, Bas atqarýshy dırektory Shýhrat Ibragımov.
Ystyq brıkettelgen temir óndirý zaýyty jobasyn ERG-diń enshiles kásiporny «QazIron ERG» JShS iske asyrady. Zaýyt jylyna 2 mln tonna ónim óndiredi dep josparlanyp otyr. Jobaǵa quıylatyn jalpy ınvestısııa kólemi – 655 mlrd teńge. Shamamen bir myńnan astam adamdy jumyspen qamtamasyz etetin óndiris orny 2029 jyly iske qosylmaq.
«Bul – Qazaqstan úshin metallýrgııa salasyndaǵy jańa dáýirdiń bastaýy bolatyn aýqymdy joba. Ol ERG-diń álemdik naryqtaǵy pozısııalaryn nyǵaıtýǵa septesedi. Osyndaı mańyzdy qadamǵa atsalysý – bizge úlken mártebe. «MIDREX Flex» sheshimderi – kennen temir óndirýdiń eń ekologııalyq taza tehnologııasy ekenin atap ótý kerek. Dástúrli ádispen salystyrar bolsaq, jańa tehnologııa óndiris barysynda bólinip shyǵatyn kómirtegi qyshqylynyń kólemin 50% tómendetedi», dedi «Primetals Technologies» kompanııasynyń vıse-prezıdenti ári jahandyq «Upstream» qurylymynyń jetekshisi Andreas Vıhbek.
Resmı jıynǵa aımaq basshysy Qumar Aqsaqalov qatysyp, sheteldik kompanııa ókilderine óńir ekonomıkasy damýynyń baǵyt-baǵdaryn ańdatty.
«Joldaýda Qasym-Jomart Kemeluly Toqaev naqty mindetter – jańa býynnyń ónerkásibin damytýdy, ekologııalyq taza tehnologııalardy engizip, sapaly jańa jumys oryndaryn ashýdy qadap tapsyrdy. Rýdnyı qalasynda ystyq brıkettelgen temir óndiretin zaýyt jobasy – osy tapsyrmalardy iske asyrýdyń jarqyn mysaly. Zamanaýı óndiris oshaǵy oblys ekonomıkasynyń órisin keńeıtip, jańa jumys oryndarynyń ashylýyna, aımaqta jańa ındýstrıaldy ekojúıe qalyptastyrýǵa tuǵyr bolady», dedi oblys ákimi.
«Midrex» prezıdenti K.S.Výdıdiń aıtýynsha, atalǵan kompanııa álemde ystyq brıkettelgen temir óndirisi boıynsha kóshbasshy sanalady. Búginde bul saladaǵy jahandyq naryqtyń 90%-y osy kompanııanyń enshisinde. Kompanııa sońǵy 50 jyl ishinde álemniń 21 elinde 100-den astam qondyrǵy ornatqan.
Qostanaı oblysy
