Foto: Úkimettiń baspasóz qyzmeti
Otyrys barysynda depýtattar Úkimet ókilderine suraqtar qoıyp, óz usynystaryn bildirdi. Depýtat Berik Beısanǵalıev aldaǵy úsh jylda ekonomıkany nyǵaıtýǵa baǵyttalǵan naqty sharalar týraly saýal qoıdy.
Oǵan jaýap bergen Premer-mınıstr Oljas Bektenov sońǵy jyldary el ekonomıkasynyń turaqty ósip kele jatqanyn atap ótti.
«Rasynda da bıýdjettik josparlaý kezinde biz konservatıvtik tásildi qoldanamyz. Sońǵy 3 jylda ekonomıkamyz turaqty ósip kele jatyr. 2023 jyly 5,1% boldy. Byltyr 5% óstik. Bıyl ósý qarqyny joǵary bolyp tur. Jalpy álemdegi ahýaldy qarasaq, álemdik ekonomıkanyń ortasha ósimi – 3%. Bizdiń iri kórshilerimizdi jáne bizge mańyzdy elderdi qaraıtyn bolsaq, olardyń ekonomıkalary da baıaýlap jatyr. Sondyqtan Úkimet tarapynan turaqty, qarqyndy ekonomıkalyq ósimdi qamtamysyz etý úshin biz bar kúsh-jigerimizdi salyp jatyrmyz», dedi Oljas Bektenov.
Premer-mınıstrdiń aıtýynsha, «Báıterek» holdıngi arqyly jalpy kólemi 8 trln teńgeni quraıtyn iri baǵdarlama iske qosylǵan. Bul qarajat mańyzdy ınfraqurylymdyq jáne ındýstrııalyq jobalardy damytýǵa baǵyttalady.
«Bizdiń qorjynymyzda basqa da keshendi is-sharalar bar. Onyń bárin qabyldap, tıisti damý qarqynyn qamtamasyz etemiz dep oılaımyz. Bıyl jalpy 190 ındýstrııalyq joba iske qosylady. Olardyń jalpy quny 1,5 trln teńgeden asady. Al barlyq salany aıtatyn bolsaq, qazirgi tańda 1681 iri joba júzege asyrylyp jatyr. Osy jobalardyń sheńberinde 40 myńǵa jýyq turaqty jumys oryndary qurylady. Alaıda, ósimmen qatar bizge makroekonomıkalyq turaqtylyq óte mańyzdy. Birinshi kezekte ınflıasııany tejeý kerek», dedi Bektenov.
Sonymen qatar, Premer-mınıstr qyrkúıektiń qorytyndysy boıynsha ınflıasııanyń deńgeıi 12,9%-dy quraǵanyn aıtty.
«Ol bizdiń pikirimizshe tym joǵary kórsetkish. Ony tómendetý kerek jáne osy baǵytta biz Ulttyq bankpen ilesip, tıisti sharalar josparyn daıyndap jatyrmyz. Ol daıyn bolǵan kezde ony jaqyn arada halyqqa jarııalaımyz. Osy barlyq faktordy esepke ala otyryp, bizdiń pikirimizshe, josparlanǵan damý qarqynynyń kórsetkishteri durys teńgerimde dep sanaımyz», dep jaýap berdi Premer-mınıstr Oljas Bektenov.
