Otyrysqa OSK tóraǵasy Nurlan Ábdirov, Eńbek jáne halyqty áleýmettik qorǵaý mınıstri Svetlana Jaqypova, EQYU-nyń Astanadaǵy baǵdarlamalar ofısiniń basshysy, elshi Alekseı Rogov, «Shyraq» múgedektigi bar áıelder assosıasııasy» qoǵamdyq birlestiginiń, Senat janyndaǵy ınklıýzııa jónindegi keńes tóraǵasy Lázzat Qaltaeva, óńirlerdegi múgedektigi bar azamattar qoǵamdyq birlestikteriniń ókilderi de qatysty.
Basqosýda alǵash bolyp sóz alǵan Nurlan Ábdirov ınklıýzıvtilik pen teń quqyqty qamtamasyz etý – memlekettik saıasattyń basym baǵyttarynyń biri ekenin tilge tıek etip, múgedektigi bar azamattardyń daýys berýi úshin qandaı jaǵdaı jasalyp jatqanyn aıtty.
– Saılaý kezinde basty nazar aýdarylatyn sanattyń biri – múgedektigi bar azamattar. Búginde elimizde osyndaı 700 myńǵa jýyq otandasymyz bar. Olardyń kópshiligi saılaý ýchaskelerine óz múmkindigin paıdalana otyryp, kele alady. Alaıda kórý nemese júrip-turý múmkindigi shekteýli azamattar da bar. Mundaı saılaýshylar úshin úıde daýys berý múmkindigi qarastyrylǵan. Biraq keı azamattar muny erekshe saıası sát dep qabyldap, óz tańdaýyn saılaý ýchaskesine baryp jasaǵysy keledi. Osy oraıda qajetti jaǵdaı jasalyp jatyr. Máselen, saılaý ýchaskesine jetý úshin ınvataksı qyzmetin paıdalana alady. Arbadaǵy azamattarǵa arnaıy quraldar, pandýstar jáne kótergishter ornatylady. Aýmaqta arnaıy buryshtar daıyndalyp, aqparattyq materıaldar kóz deńgeıinde ornalastyrylady. Al kózi kórmeıtin azamattar úshin Braıl shrıftimen jasalǵan trafaretter, aýdıo-nusqaýlyqtar, úlkeıtkishter jáne basqa da quraldar usynylady. Jalpy, birlesken nátıjeli áriptestiktiń arqasynda biz qoljetimdi jáne ınklıýzıvti saılaý júıesin qalyptastyrý jolynda júıeli túrde ilgerilep kelemiz, – deıdi OSK tóraǵasy.
Jıynda vıdeo arqyly Aqtóbe oblysyndaǵy aýmaqtyq saılaý komıssııasynyń qanatqaqty jobalar aıasynda júrgizip jatqan jumysy kórsetildi. Onda mamandar múmkindigi shekteýli azamattardyń saılaý úderisine kedergisiz qatysýyn qamtamasyz etýde joǵaryda atalǵan múmkindikti qalaı qoldanatynyn egjeı-tegjeıli túsindirgen.
Sondaı-aq otyrysta Ortalyq saılaý komıssııasy men Eńbek jáne halyqty áleýmettik qorǵaý mınıstrligi yntymaqtastyq týraly kelisimge qosymsha retinde Jol kartasyn bekitti. Qujat vedomstvoaralyq ózara is-qımyldy júıeli túrde damytýǵa jáne múgedek azamattardyń saılaýǵa teń qatysýyna jaǵdaı jasaýǵa baǵyttalǵan. Ony ázirleý barysynda jumys tobynyń múshelerinen jáne aýmaqtyq saılaý komıssııalarynan kelip túsken 200-den asa usynys pen pikir eskerilgen.
– Memleket basshysy Qasym-Jomart Toqaevtyń bastamasymen 2025–2030 jyldarǵa arnalǵan ınklıýzıvtik saıasat tujyrymdamasy qabyldandy. Tujyrymdama aıasynda múgedektigi bar azamattardyń qoǵamdyq-saıası ómirge qatysýyn qamtamasyz etý úshin arnaıy sharalar bekitildi. Bes jylǵa ázirlengen Jol kartasy saılaý úderisiniń qoljetimdiligi men jańa tehnologııalardy engizý salasynda naqty baǵyttardy aıqyndaıdy. Onyń iske asyrylýy turaqty ınklıýzıvti tájirıbelerge kóshýge múmkindik beredi. Jańashyldyqtyń biri – saılaý ýchaskeleriniń qoljetimdiligine qatysty inva.gov.kz portalyn kezeń-kezeńimen sıfrlandyrý. Ár azamat fızıkalyq nemese ózge de shekteýlerine qaramastan el ómirine belsene qatysýǵa teń quqyly. Saılaý úderisiniń qoljetimdiligin qamtamasyz etý – bul tek tehnıkalyq jaǵdaılardy jasaý máselesi emes, múgedektigi bar adamdardyń azamattyq ustanymyna qurmet kórsetýdiń, olardyń daýys berý jáne el bolashaǵyna yqpal etý quqyqtaryn tanýdyń aıqyn kórinisi, – deıdi Eńbek jáne halyqty áleýmettik qorǵaý mınıstri Svetlana Jaqypova.
Kún tártibindegi ekinshi másele – saılaý uıymdastyrýshylary úshin múgedektigi bar azamattardyń saılaý quqyqtary men qajettilikterine arnalǵan beınekýrsty talqylaýǵa baǵyttaldy. Beınekýrsty Astanadaǵy EQYU Baǵdarlamalar ofısi men «Shyraq» múgedektigi bar áıelder assosıasııasy» qoǵamdyq birlestigi birge ázirlegen.
– Ofıs mandatyna sáıkes ınklıýzıvti saılaý quqyqtaryna arnalǵan oqý kýrsyn usynamyz. Bul – Qazaqstandaǵy 10 myńnan astam saılaý komıssııasyna barlyq azamattyń saılaý úderisine teń jáne kemsitýsiz qatysýyn qamtamasyz etýge múmkindik beredi. Kýrs komıssııalardyń kásibıligin arttyrady jáne qoǵamnyń saılaýǵa degen senimin nyǵaıtady, – deıdi Alekseı Rogov.
«Shyraq» múgedektigi bar áıelder assosıasııasy» qoǵamdyq birlestiginiń tóraǵasy Lázzat Qaltaeva beınekýrs saılaý komıssııalary qyzmetkerlerine arnalǵan tájirıbelik kómekshi ekenin aıtty. Onda saılaý ýchaskelerin jabdyqtaý, múgedektigi bar saılaýshylarmen qarym-qatynas jasaý kezinde ádep normalaryn saqtaý, sondaı-aq daýys berý oryndaryn jabdyqtaýǵa qoıylatyn qoldanystaǵy normatıvtik talaptar men standarttar jónindegi qajetti aqparattar bar.
Jumys tobynyń otyrysy gıbrıdti, ıaǵnı onlaın jáne oflaın formatta ótti.
