Sarapshylardyń aıtýynsha, búginde Qazaqstanda TJA dıagnozy qoıylǵan 380 myńnan astam bala bar. Jyl saıyn shamamen 2,5 myń jańa jaǵdaı tirkeledi, onyń 400-ge jýyǵy Almaty qalasynda turady. Tek 2025 jyldyń alǵashqy alty aıynda Almatyda 18 jańa týǵan nárestege ota jasaldy. 2024 jyly elimizde balalardaǵy júrek aqaýlaryn túzetýdiń 1,7 myń otasy jasalyp, onyń shamamen 500-i Astanadaǵy UMC Júrek ortalyǵynda ótti.
«Týabitti júrek aqaýlary – balalar arasyndaǵy eń jıi kezdesetin patologııalardyń biri, ol alǵashqy aptalar men aılarda kóbine belgileri kórinbeıdi Ata-analardyń bilmestigi men dıagnostıkaǵa qoljetimdiliktiń birkelki bolmaýy aýrýdy kesh anyqtaýdyń basty sebepkeri bolyp otyr», – dedi Murat Zaýyrov.
Der kezinde medısınalyq kómek kórsetilmese, mundaı aýrýlar óte asqynyp, tipti ómirge qaýip tóndirýi múmkin. О́z kezeginde Tatıana Ivanova-Razýmova qazirgi zamanǵy prenataldyq skrınıng ádisteri júktiliktiń 18–21 aptasynda aýyr júrek aqaýlarynyń 85%-yna deıin anyqtaýǵa múmkindik beretinin aıta kele:
«Júktiliktiń ekinshi trımestrinde jasalatyn fetaldy ehokardıografııa – kúrdeli júrek aqaýlaryn erte anyqtaýǵa múmkindik beretin mańyzdy qural. Erte dıagnostıka ata-analarǵa bosanýǵa daıyndalyp, keıingi em qabyldaıtyn klınıkany tańdaýǵa múmkindik beredi», dedi.
Búginde Qazaqstanda jańa týǵan nárestelerge, sonyń ishinde salmaǵy tómen balalarǵa da kardıohırýrgııalyq operasııalar jasaýǵa tolyq tehnıkalyq múmkindik bar. Mundaı otalar kóbine ómiriniń alǵashqy aılarynda jasalyp, balalarǵa tolyqqandy ómir súrýge jáne damýǵa jaǵdaı jasaıdy. Árbir jaǵdaı jeke qarastyrylǵanymen, kúrdeli týa bitken júrek aqaýlarynda hırýrgııalyq aralasý negizgi túzetý ádisi bolyp qala beredi.
Osy oraıda Almatyda «Heart Center Foundation» qoǵamdyq qory ata-analar men dárigerlerge arnalǵan Pasıentter mektebin uıymdastyryp otyr. Baǵdarlama eki baǵyttan turady: ata-analarǵa arnalǵan aqparattyq sessııa jáne pedıatrlar, neonatologtar men fýnksıonaldyq dıagnostıka dárigerlerine arnalǵan ehokardıografııa boıynsha sheberlik sabaǵynan turady. Sarapshylar ata-analarǵa júktilik kezinde qandaı tekserýler mańyzdy ekenin jáne operasııadan keıin balany qalaı kútý kerektigin túsindiredi.
Murat Zaýyrovtyń aıtýynsha, baǵdarlamanyń maqsaty – qoǵam men dárigerler arasyndaǵy senim men ózara baılanys deńgeıin arttyrý.
«Biz balalarǵa kómek kórsetýdegi ata-analardyń habardarlyǵy men dárigerler der kezinde dıagnoz qoıyp, kómektese alatyn mádenıetti qalyptastyrǵymyz keledi. Bul tek medısına emes, búkil qoǵamnyń ortaq isi», deıdi.
Sondyqtan mamandar erte dıagnostıka – balanyń ómiri men densaýlyǵyn saqtap qalýdyń basty múmkindigi ekenin alǵa tartty.
