Foto: primeminister.kz
Qazir Qazaqstanda 12 myńǵa jýyq kitaphana respýblıkalyq deńgeıden bastap aýyldyq eldi mekenderge deıin halyqqa qyzmet kórsetedi. Sonyń 4 myńǵa jýyǵy Mádenıet jáne aqparat mınıstrliginiń qaramaǵynda. Aıda Balaeva quttyqtaýynda rýhanı murany saqtaıtyn qazynaly orynda qyzmet atqaryp júrgen kitaphanashylardyń eńbegin erekshe atap ótti.
«Kitaphana – ulttyń rýhanı damýynyń tuǵyry, bilim men mádenıettiń bastaý-bulaǵy. Ol tek aqparat ortalyǵy emes, halyqtyń tarıhı jady men rýhanı murasyn saqtaıtyn qazyna, ulttyq sanany kemeldendiretin orta. Memleket basshysy atap ótkendeı: «Kitaphana – memlekettiń, ulttyń negizgi jady». Sondyqtan biz bilim men ǵylymǵa umtylǵan qoǵam qalyptastyrýǵa udaıy kúsh salýymyz qajet.
Mektepter men kolledjderde, joǵary oqý oryndary men ǵylymı-zertteý uıymdarynda jumys isteıtin kitaphanalar da qoǵamnyń zııatkerlik áleýetin arttyrýǵa mańyzdy úles qosyp keledi. Bul salada elimiz boıynsha 20 myńǵa jýyq kásibı maman eńbek etedi. Sizderdiń qajyrly eńbekterińizdiń arqasynda elimizdiń árbir azamaty bilimge jol taýyp, rýhanı baılyqqa qol jetkizip otyr. Aldaǵy ýaqytta da ult bolashaǵyn tárbıeleý, qoǵamnyń mádenı deńgeıin kóterý jáne ulttyq qundylyqtardy dáripteý baǵytyndaǵy qyzmetterińiz jemisti bolsyn. Qurmetti áriptester! Kásibı merekelerińizben quttyqtaı otyryp, barshańyzǵa zor densaýlyq, otbasylaryńyzǵa amandyq, shyǵarmashylyq shabyt jáne tolaıym tabys tileımin! Mereke qutty bolsyn», dedi mınıstr.
