Foto: Aqorda
«Higgsfield AI startapy – bıylǵy aıtýly jetistikterdiń biri. Ony Qazaqstannyń alǵashqy «syńarmúıiz» startapy deýge bolady. Ádette jahandyq naryqta bir mıllıard dollarǵa nemese odan da qymbatqa baǵalanǵan kompanııalardy osylaı ataıdy. Bul biregeı jobanyń negizi Astana Hub alańynda qalanǵan bolatyn. Muny matematıka jáne fızıka pánderinen jasóspirimder arasyndaǵy halyqaralyq olımpıada jeńimpazdary, daryndy entýzıastar jasady. Osyndaı myqty azamattar – elimizdiń keleshegi. Jas kásipkerler, ǵalymdar, ınjenerler, IT-mamandar Qazaqstannyń jańa elıtasyn qalyptastyrýda. Al jańashyldyq – ulttyq sıpatymyzdyń mańyzdy qyryna aınaldy. Demek, memleket qoldaý kórsetse, bilimdi, eńbekqor balalarymyz ben nemerelerimiz álemdik naryqta suranysqa ıe joǵary tehnologııalyq ónimder jasaı alady. Alaıda birli-jarym tabysqa toqmeıilsýge bolmaıdy. Sondyqtan Sondyqtan Úkimetke kelesheginen úmit kúttiretin otandyq startaptardyń naryqta laıyqty ornyn tabýyna kómektesetin zamanaýı, tıimdi ekojúıe qurý mindeti júkteldi», dedi Prezıdent.
Memleket basshysy: «Jasandy ıntellekt pen sıfrlyq quraldar elimizdi órkendetý úshin qyzmet etýge tıis»
«Qazaqstan sıfrlandyrý kórsetkishi boıynsha dúnıejúzilik ındeksterde joǵary oryndardy ıelenedi. Bul, árıne, qýanarlyq jaǵdaı. Biraq, eń bastysy, boldyq, toldyq deýge bolmaıdy. Álemdegi eń joǵary talaptarǵa saı keletin zamanaýı ekonomıkany damytý úshin ǵylymı-tehnıkalyq progresti jiti baqylap otyrý qajet. Sondyqtan biz sıfrlandyrý men jasandy ıntellektini jan-jaqty engizýdi memleket damýynyń basym baǵyty retinde belgiledik. Qazaqstannyń jahandyq ozyq úrdisterden keıin qalýyna bolmaıdy. Áıtpese, zamana kóshine ilese almaımyz. Al onyń saldary óskeleń urpaqqa tııýi múmkin. Jumys bastaldy. Alǵashqy ulttyq sýperkompıýter iske qosyldy. «Qazaqtelekom» bazasynda taǵy bir sýperkompıýter jumys istep tur. AI Sana baǵdarlamasy jáne aýqymdy Alatau City jobasy qolǵa alyndy. Atalǵan baǵyttaǵy asa mańyzdy jumysty zańnamalyq turǵydan qamtamasyz etý sharalary qabyldanyp jatyr. Strategııalyq mindetimiz – Qazaqstandy úsh jyl ishinde tolyq sıfrlyq elge aınaldyrý. Jasandy ıntellekt pen sıfrlyq quraldar elimizdi órkendetý úshin qyzmet etýge tıis. Ýaqyt ozdyrmaı, bilimge negizdelgen ekonomıka qurýǵa kirisý qajet. Kreatıv pen ınnovasııa ósimniń arqaýy, al zııatkerlik kapıtal eldiń básekege qabilettiliginiń ózegi bolýǵa tıis», dedi Q.Toqaev.
