Ekonmıst Murat Temirhanovtyń aıtýynsha, jańa zań jobasynda túbegeıli ózgerister joq. Qujatta kórsetilgen kóptegen «jańa tetikter» buǵan deıin de qoldanysta bolǵan. Mysaly, memleket tek júıeli mańyzy bar bankterge ǵana kómektesedi nemese shyǵyn aksıoner esebinen jabylady degen baptar burynnan bar normalardy qaıtalap otyr.
«Basty qaýip memleketke tıesili shyǵyndy ózge bankter esebinen jabý týraly usynys. Bul tásil halyqaralyq tájirıbege tolyq saı emes jáne otandyq bank sektorynyń turaqtylyǵyna keri áser etýi múmkin. Halyqaralyq qarjy keńesi usynǵan standarttar mundaı sharany tek erekshe jaǵdaıda, basqa múmkindikter taýsylǵan kezde ǵana qoldanýǵa bolatynyn kórsetedi. Qazirgi júıeniń taǵy bir álsiz tusy bank daǵdarysyn basqarýdaǵy táýelsiz organnyń joqtyǵy», deıdi ekonomıst.
Taǵy bir mańyzdy másele – Ulttyq banktiń róli. Jobaǵa sáıkes, ol tólem qabilettiligin joǵaltqan bankke sońǵy ınstansııa retinde nesıe bere alady. Bul halyqaralyq erejelerge qaıshy keledi, sebebi mundaı kómek tek tólem qabileti bar bankterge ǵana kórsetilýi tıis.
M. Temirhanov jańa zań jobasynda ashyqtyq pen naryqtyq qaǵıdalar jetispeıtinin de atap ótti. Onyń pikirinshe, memleket pen bankter arasyndaǵy shekara naqty bólinýi kerek. Úkimettiń tómen paıyzben nesıe berýi naryqtaǵy ádil básekeni buzady. Jańa zań jobasy bank júıesin jańǵyrtpaıdy, tek burynǵy shemalardy zańdastyrady. Eger memleket pen naryqtyń arasy anyq ajyratylmasa, onda bank sektory qaıtadan sol eski qatelikterdi qaıtalaıdy.
