Kezdesýde saýda men ınvestısııalyq yntymaqtastyqqa basa nazar aýdaryldy. Sonymen qatar ónerkásip, energetıka, sıfrlyq damý, kólik pen logıstıka, sý resýrstary, qarjy, agroónerkásip salalaryndaǵy ózara is-qımyl máseleleri qaraldy. Oljas Bektenov Úkimet eki el arasyndaǵy barlyq kelisimniń oryndalýyn baqylaýda ustaıtynyn aıtty. Fınlıandııa elimiz úshin Eýropalyq odaqtaǵy mańyzdy seriktes ekeni atap ótildi.
Kelissózder barysynda saýda kólemin ulǵaıtý, onyń qurylymyn ártaraptandyrý men ekonomıkanyń negizgi salalaryna jańa tehnologııalar engizý baǵytynda úlken múmkindik bar ekeni aıtyldy. Taraptar elimizde birlesken ınvestısııalyq jobalardy iske asyrý máselesin talqylady. Áńgime kólik salasyna arnalǵan logıstıkalyq ortalyqtar men eksportqa baǵyttalǵan óndiristik alańdar salý týraly órbidi.
Sıfrlyq transformasııa salasyndaǵy yntymaqtastyq ta basty nazarda boldy. Elimiz sýperkompıýterdi iske qosqanyn aıtyp, Eýropadaǵy eń qýatty esepteý júıeleriniń biri LUMI-men jumys isteıtin Fınlıandııamen tájirıbe almasýǵa daıyn ekenin málimdedi.
«Memleket basshysy atap ótkendeı, Qazaqstan Fınlıandııamen yntymaqtastyqtyń jańa baǵyttaryn damytýǵa daıyn. Biz ekonomıkanyń basym sektorlarynda birlesken jobalardy júzege asyrýǵa múddelimiz. Úkimet elimizge kelgen ınvestorlarǵa jan-jaqty qoldaý kórsetedi», dedi O.Bektenov.
Fınlıandııa Prezıdenti Aleksandr Stýbb Qazaqstannyń ınvestorlarǵa qolaıly jaǵdaı jasaý boıynsha júrgizip jatqan jumystaryna oń baǵa berip, eki el arasyndaǵy yntymaqtastyqty tereńdetýge múddeli ekenin bildirdi.
