Sýret: kz.kursiv.media
Otyrysty ashqan depýtat Elnur Beısenbaev Májiliste dástúrli emes jynystyq baǵdar men pedofılııany nasıhattaıtyn toptardyń jumysyna qatysty birneshe depýtattyq saýal bolǵanyn atap ótti. Sondaı-aq ol halyq tarapynan da arnaıy petısııa jarııalanyp, oǵan 2 myńnan asa azamat qol qoıǵanyn eske saldy.
«Birqatar depýtat arnaıy normalardy daıyndap, Úkimetke joldady. Qorytyndysy keldi. Keıbir tustary pysyqtaýdy qajet etse de, negizinen bul normalardy Úkimet qoldady. Tolyqtyrý balalardyń quqyǵyn qorǵaýdy jáne qoǵamda ulttyq, moraldyq qundylyqtardy saqtaýdy kózdeıdi», dedi depýtat.
Jıynda depýtat Edil Jańbyrshın dástúrli emes jynystyq baǵdar syndy ulttyq qundylyqtarǵa qaıshy keletin áreketterdi kópshilik aldynda dáripteýge qarsy ekenin jetkizdi. Ásirese psıhıkasy qalyptaspaǵan jasóspirimderdiń arasynda mundaı nasıhat júrgizýge jol berýge bolmaıtynyn aıtty.
«Eger bolashaq urpaqtyń amandyǵyn oılasaq, olardyń sanasyna teris áser etetin, ultymyzdyń tabıǵı bolmysyna jat nárselerdiń taralýyna qarsy turýymyz qajet. Qoldanystaǵy zańnamada álemdik jáne ulttyq mádenıetti dáripteý týraly 34-bap bar. Sol bapta mádenı, ádebı, basqa da kópshilik is-sharalarda zorlyq-zombylyqty, pornografııany jáne qoǵamǵa jat ózge de qubylystardy nasıhattaýǵa tyıym salynatyny kórsetilgen. Biz osy normaǵa qosymsha retinde dástúrli emes jynystyq baǵdardy jáne pedofılııany nasıhattaý da zańmen qýdalanatynyn naqtylap engizip otyrmyz. Bul túzetý jumys tobynyń kóptegen múshesi tarapynan qoldaý taýyp, biraýyzdan qabyldandy. Endi aldaǵy ýaqytta álemdik mádenıet nemese ulttyq mádenıet aıasynda ótetin kez kelgen is-sharalarda LGBT qozǵalysyn, pedofılııany nemese qoǵamymyzǵa, ulttyq mentalıtetimizge jat ıdeıalar dáriptelse, bul áreketter zań júzinde qýdalanady», dedi depýtat.
Negizi buryn zań aıasynda mundaı naqty tyıymdar bolmady. Saldarynan keıbir qoǵamdyq birlestikter men uıymdar ártúrli aksııa, mıtıng, parad ótkizip, áleýmettik jeliler arqyly óz ustanymdaryn ashyq nasıhattap keldi. Endi depýtattar zań júzinde shekteýden bólek, kıno, ádebıet, spektakl syndy mádenı ónimder arqyly mundaı ıdeıalardyń taralýyna jol bermeý kerek dep otyr.
«Mysaly, Kanada men Amerıkada júrgizilgen 2022–2023 jyldardaǵy táýelsiz zertteýler kórsetkendeı, LGBT ókilderi arasyndaǵy 13 pen 24 jas aralyǵyndaǵy azamattardyń sýısıdke barý kórsetkishi AQSh-ta – 41%, Kanadada 25%-dy quraǵan. Al geteroseksýaldy jastar arasynda bul kórsetkish úsh ese tómen. Iаǵnı mundaı ıdeologııa jastardyń psıhıkasyna óte aýyr áser etetinin dáleldeıdi», dedi E.Jańbyrshın.
Basqosýǵa qatysqan ózge de Úkimet ókilderi, Májilis depýtattary Nurlan Áýesbaev, Aına Mysyrálimova, Natalıa Dementeva, Anas Baqqojaev, Janarbek Áshimjan, Bolat Kerimbek, Amanjol Áltaı pikirlerin ortaǵa salyp, tıisti normany qoldaıtynyn bildirdi. ZOOM arqyly qosylǵan Rınat Zaıyt ta talqylanyp otyrǵan máseleniń ózekti ekenin tilge tıek etti.
