Bıyl 41 ýchaske boıynsha úsh konkýrs uıymdastyrylyp, 6,4 myń gektar jer ıelerin tapqan. Qalǵan 16,7 myń gektar jer 2026 jyldyń alǵashqy jartysyna deıin konkýrs negizinde sharýalarǵa beriledi.
Aýdannyń agrarlyq salasynda da oń dınamıka baıqalady. Bıylǵy jyldyń toǵyz aıynda 24,3 mlrd teńgeniń aýyl sharýashylyǵy ónimi óndirilip, egis kólemi 30,7 myń gektardy qurady. Dıqandar 47 jańa tehnıka satyp alyp, «Keń Dala-2» baǵdarlamasy aıasynda 605,8 mln teńge jeńildetilgen nesıe alǵan.
Sonymen qatar, Islam Damý Bankiniń qarjysymen «Kóksý aýdanynyń sýarý jelilerin qaıta jańartý» jobasy júzege asýda. Joba 2027 jyly aıaqtalyp, 16 myń gektar aýmaqtyń sýarmaly júıesi jaqsarmaq.
Aýdannyń veterınarııalyq ınfraqurylymy da jańaryp keledi: sońǵy eki jylda 8 aýylda jańa veterınarııalyq pýnktter ornatylyp, 4 qyzmettik kólik satyp alynǵan.
Kezdesýde turǵyndar aýyzsý, jaryqtandyrý, abattandyrý jáne káriz júıesi máselelerin kóterdi. Ákim bul baǵyttaǵy jobalardyń kezeń-kezeńimen iske asatynyn aıtty. Sondaı-aq óńir basshysy M. Seńgirbaev atyndaǵy ortalyq saıabaqtyń abattandyrý barysymen jáne jańa 20 páterli turǵyn úımen tanysty.
Qorytyndysynda, oblys ákimi turǵyndardyń suraqtaryna jaýap berip, kóterilgen máselelerdiń barlyǵy baqylaýǵa alynatynyn jetkizdi.
