Almaty-Kókpek-Kóktal tas jolynyń 25-shi shaqyrymynda Audi kóliginiń júrgizýshisi joldan ótip bara jatqan eki adamdy joǵary jyldamdyqpen qaǵyp, oqıǵa ornynan qashyp ketken.
Jol apaty vıdeoǵa túsip qalǵan. Áleýmettik jelide tez tarap ketken kadrda kóliktiń joǵary jyldamdyqpen jaıaý júrginshilerdi qaqqanyn kórýge bolady.
Almaty oblystyq polısııa departamentiniń baspasóz qyzmeti oqıǵaǵa qatysty túsinikteme berdi. Polısııanyń málimetinshe zardap shekkenderdiń biri oqıǵa ornynda kóz jumǵan, al ekinshisi aýyr jaraqatpen aýrýhanaǵa jatqyzyldy.
Júrgizýshiniń kim ekeni anyqtaldy, ol ustalyp, ýaqytsha ustaý ızolıatoryna qamaldy.
«Qazirgi ýaqytta oqıǵanyń barlyq mán-jaıyn jan-jaqty jáne obektıvti túrde anyqtaýǵa baǵyttalǵan tergeý is-sharalary júrgizilip jatyr», - dep túsindirdi oblystyq polısııa departamenti.
Tergeý barysy departament basshylyǵynyń qatań baqylaýynda bolady.
