Foto: egemen.kz/ Mereı Qaınaruly
Tikushaq kókke kóterilgende-aq qyraǵy kózdi ınspektorlar ormandy alqapty baqylap otyrǵan. Aıta keteıik, josparly reıd tek Rıdder orman sharýashylyǵy aýmaǵynda júrgiziledi.
Batys Altaıdyń bıigin tuman tumshalap, júdeńki kúıge túsipti. Keshegi qulpyryp turǵan qyzyldy-sary japyraqty qazannyń qara daýyly aıaq asty etken. Áne-mine qar basady.
Shatqaldardy aralaı, ózenderdi jaǵalaı ushtyq. Adam aıaǵy baspaıdy-aý degen jerge deıin barlaý jasadyq. Biraq adam aıaǵy baspaıtyn jer bar ma qazir?! It tumsyǵy ótpes taıgany da, quzar bıik shyńdy da, tipti sonaý teńiz túbin de zerttep tastady ǵoı. Onyń ústine, ózender tartylyp, móldirep aǵyp jatqan ýaqytta balyqshylar úıde qaıdan jatsyn?!
Aıtqandaı-aq, Batys Altaıdyń qoıyn-qonyshyn aralaı aǵyp jatqan Úlbi ózeniniń bas jaǵynda qaz-qatar tizilip turǵan balyqshylardy baıqap qalyp, qondyq.
О́kinishtisi, balyqshylar turaqtaıtyn tustar qoqysqa toly. Ony kórgen ınspektorlar balyqshylarǵa eskertý jasady.
Altaıdyń keıbir bıikterin qar basqan. Kúzge salym asyr salǵan aıý ataýly endigi uıqyǵa ketse kerek-ti.
Úbi ózeni bastaý alyp jatqan tusty tóńirektep kele jatqanymyzda tómendegi soqpaqpen zytyp bara jatqan júk kóligi kózge túspesi bar ma?! Ákki ushqyshtar kóliktiń aldyna kese-kóldeneń qona ketti.
Túý túkpirde kózge túse qoıamyn dep oılady ma bul azamat?! Balyǵyn aýlap, alańsyz úıine qaıtyp bara jatqan jerinde ınspektorlar kókten túsip, toqtatqan.
Kólikti tintken quzyrly organ mamandary ruqsat etilmegen quralmen balyq aýlaǵanyn anyqtady. Qos qapta mólsheri 15-20 keli balyq bar eken.
Sondaı-aq kólik oryndyǵynyń artynda qarý bar ekeni belgili boldy. Rıdder turǵyny qarýdyń qujaty baryn aıtyp, rastaıtyn qujattaryn qosa usyndy. Ol jaǵy zańdy bolǵanymen, balyq aýlaý tásili tártipke saı emes.
Rıdder qalasynyń A esimdi turǵynyna tyıym salynǵan quraldarmen balyq aýlaǵany úshin Ákimshilik kodekstiń 383 baby, 3-bóligi boıynsha hattama toltyrylyp, sotqa joldanady.
Mamandardyń aıtýynsha, reıd jumystary áli de jalǵasady.
