Kollajdy jasaǵan – Qonysbaı ShEJIMBAI, «EQ»
Jaqynda «О́rleý» jeńildikpen nesıeleý baǵdarlamasy arqyly bıznesin dóńgeletip otyrǵan Almaty irgesindegi birneshe zaýytta boldyq. Tek «О́rleý» ǵana emes, «Damý» qorynyń baǵdarlamasyna qatysqan kásipkerlerdiń de bıznes-keısterimen tanystyq. «Damý» kásipkerlikti damytý qory Almaty qalasy boıynsha óńirlik fılıalynyń dırektory Jandos Nurǵazınovtiń aıtýynsha, memlekettik qoldaý quraldary kásipkerlerdiń damýyna, jumys oryndaryn ashýyna, naryqtaǵy pozısııasyn nyǵaıtýǵa sep bolady. Bul óńirlik ekonomıkanyń turaqtylyǵyna, adamdardyń ómir súrý sapasyna tikeleı áser etedi», deıdi ol.
Biz toqtaǵan alǵashqy nysan ADSK nemese Almaty jol qurylys kompanııasy qazirgi zamanǵy jabdyqtarmen joǵary sapaly trotýar plıtkalaryn, qabyrǵa bloktaryn shyǵarady. Bul kompanııa naryqta ózin bólshek, kóterme tapsyrystardyń senimdi jetkizýshisi retinde tanylǵan.
2020 jyly «Damý» qory 4,2 mıllıon teńge kepildigimen 25 mıllıon teńge kólemindegi aınalym qarajaty nesıesi boıynsha paıyzdyq mólsherlemeni 6 paıyzǵa deıin sýbsıdııalady. Búginde kompanııa jergilikti tutynýshylarǵa jeke tapsyrys boıynsha daıyndalǵan joǵary sapaly ónimderdi usynyp otyr.
Keıingi jyldary «Almaty jol qurylysy» kásiporny satý naryǵyn keńeıtip, kórshiles oblystarǵa ónim jetkizip, óndiris kólemin aıtarlyqtaı ulǵaıtty. Jabdyqtar Italııa men Germanııadan satyp alyndy. Bir aýysymda 4 myńnan astam tósenish pen 4 shaqyrymnan astam jol jıegi shyǵarylady.
Almatyda buryn bir ǵana asfalt zaýyty jumys istegen. Qazir «ADSK» JShS asfalt zaýytyn, onyń ishinde syıymdylyǵy 1 myń tonna bıtým, 700 tonna mıneraldy untaq, 3 myń tonna qıyrshyq tas, mazýt qoımalaryn, elektr stansasyn qamtıdy. Bas dırektordyń orynbasary Arken Baratovtyń aıtýynsha, kompanııanyń tarıhy Almaty oblysy Alekseevka aýylyndaǵy karerden qıyrshyq tas óndirýden bastalǵan. Qazir asfalt zaýytynda 120 túrli jol taqtaıshalary, bes-alty túrli jol jıegine qoldanylatyn qurylys materıaldary shyǵarylady. Sondaı-aq Reseıdiń «Ýralmash» zaýytymen 240 myń dollarǵa karerdi ázirleýge arnaıy jabdyqtar jetkizý týraly kelisim jasalǵan. Qazir ADSK birneshe zaýyttyń jumysyn úılestirip otyrǵan úlken kompanııalar tobyna aınaldy. Kompanııaǵa qarasty eki karer, 5 asfalt zaýyty, bir bıtým zaýyty bar. Sońǵysy, ázirge elimizde jalǵyz. Jumys úderisi tolyq avtomattandyrylǵan, bıtým qospasy arnaıy baǵdarlama boıynsha daıyndalady. Bıtýmǵa qajet qospalardyń birazy Reseı men Belorýstan keledi.
– Bizde bıtým máselesi óte kúrdeli, tolyq sheshimin tapqan joq. Ishki naryqta Kaspıı bıtýmnan alamyz. Biraq olar tolyq kólemde jetkizip bere almaǵandyqtan, ımportqa táýeldimiz, – deıdi A.Baratov.
Onyń sózinshe, ADSK qazirgi deńgeımen toqtap qalmaıdy. Bıznes joba taǵy da birneshe zaýytpen tolyqqaly tur.
– Almaty men kórshiles oblystardyń qajettiligin óz kúshimizben qamtamasyz etsek deımiz. Naryqtyń osy segmentinde bizge ımport báseke bola almaıdy. Endi bıtým quramyna paıdalanatyn keıbir qosparlardy ózimizde shyǵarýdy qolǵa alamyz, – deıdi bas dırektordyń orynbasary.
Kelesi toqtaǵan nysan – «Qaz Package» JShS 2023 jylǵy 20 qańtarda ashylǵan. Bul kompanııa et, balyq, kókónis jáne kondıterlik ónimder sııaqty azyq-túlik ónimderin oraýǵa arnalǵan kóbiktengen polıstıroldan (VPS) lotoktar óndirýge mamandanǵan. Sondaı-aq óz ónimderi úshin plastıkalyq qaqpaqtar usynady.
Kásiporyn ártúrli úlgidegi et salǵysh ydys pen tez daıyndalatyn kespe tabaqshalarynyń 19 túrin óndiredi. О́nimderdiń alǵashqy synaq partııasy byltyr jylǵy qazanda shyǵaryldy. Jobanyń biregeıligi: suranysqa ıe qaptama ónimderin jergilikti jerde óndirý arqyly ımporttyń ornyn basý, jańa jumys oryndaryn ashý. «Bank RBK» AQ arqyly kompanııa ınvestısııaǵa 580,5 mln teńge qarjy alsa, «Ulttyq joba» baǵdarlamasy aıasynda 100 mln teńgeni aınalym qarajatyn tolyqtyrý úshin aldy. Baǵdarlama sharttaryna sáıkes 21,75% paıyzdyq mólsherlemeniń 13,75%-yn qor sýbsıdııalaıdy. Sondaı-aq kompanııaǵa 174,8 mln teńgege qor kepildik te berdi.
Bas dırektor Muhtar Nurjigitovtiń aıtýynsha, syrt kózge qarapaıym zat bolsa da tabaqshalardyń daıyndalý tarıhy úlken logıstıkalyq tizbekten turady. Bir ret paıdalanylatyn plastıkalyq ydystar otandyq naryqta bertinde ǵana paıda bolǵanymen, ónimge suranys joǵary. Bul tabıǵı materıaldardan jasalǵan bıologııalyq ydys. Bas dırektordyń aıtýyna qaraǵanda, ónimniń quramyndaǵy polıstırol Qytaıdan, qyzyldy-jasyldy untaq kúıinde jetkiziledi. Arnaıy mamandandyrylǵan zerthana onyń quramynyń tazalyǵy tekseristen ótken soń arnaıy avtomattandyrylǵan sehta ártúrli úlgidegi ydystarǵa aınalady.
– Naryq kúndelikti qoldanatyn taýarlardyń múmkindigine endi nazar aýdaryp jatyr. Buryn ónimniń osy túriniń 100 paıyzy ımport bolsa, qazir 40-50 paıyzy otandyq ónim óndirýshilerdiń úlesinde. Polıstırol shıkizatyn daıyndaý máselesi memlekettik deńgeıde sheshilse, bizdiń qamtıtyn aımaǵymyzdyń shekarasy ulǵaıady, – deıdi M. Nurjigitov.
ALMATY
