О́ńirde 2 myńnan astam áleýmettik qorǵaý júıesi mamany jumys isteıdi. Olar úı jaǵdaıyndaǵy 308 múmkindigi shekteýli balaǵa, 1 776 jalǵyzbasty qart pen múgedekke qamqorlyq jasaıdy. Odan bólek, 6 ataýly áleýmettik qyzmet kórsetý, 27 belsendi uzaq ómir súrý, 13 otbasyny qoldaý ortalyqtary jumys isteıdi. Bıyl osy ortalyqtarǵa kelgen 12 myńnan astam adamǵa quqyqtyq, áleýmettik, psıhologııalyq kómek kórsetilgen.
Halyqtyń áleýmettik osal toptaryn qorǵaý salasynda jyldan-jylǵa ilgeri basýshylyq seziledi. Sonyń bir dáleli, Temir aýdanynda salynyp jatqan tirek-qımyl júıesinde múgedektigi bar balalarǵa arnalǵan 130 oryndyq ońaltý ortalyǵy men Aqtóbe qalasyndaǵy Eset batyr turǵyn úı alabynda salynyp jatqan 150 oryndyq eresek múgedekterdi saýyqtyrý ortalyǵy.
Saltanatty sharada óńir basshysy Ashat Shaharov halyqty jumyspen qamtý, jumyssyz azamattardy qaıta mamandandyrý, jańa bıznes-ıdeıalardy qoldaýdaǵy áleýmettik qyzmetkerlerdiń eńbegine erkshe toqtaldy.
– Jumysshy mamandyqtary jyly aıasynda 40 myńnan astam adam, sonyń ishinde 1 131 múgedektigi bar azamat jumysqa ornalastyryldy, 567 adam jańa bıznes-ıdeıalarǵa memlekettik grant aldy, 519 adam jańadan kásiptik bilim aldy. Memlekettik ınspektorlar kómegimen 6 184 eńbekkerdiń quqyǵy qorǵaldy, – degen oblys ákimi Prezıdent Joldaýynda kórsetilgen áleýmettik saıasatty birizdendirý, sıfrlandyrýǵa baılanysty qolǵa alynyp jatqan sharalardy atap ótti. – Osyǵan baılanysty Aqtóbe oblysynda áleýmettik qorǵaý salasynda birqatar daıyndyq jumysy júrgizilip jatyr. FSM «Social» mobıldik qosymshasy arqyly ómirlik qıyn jaǵdaıǵa tap bolǵan otbasylardy erte anyqtap, olarǵa ýaqtyly, naqty kómek kórsetý júıesi engizildi. Búginde osy qosymshanyń kómegimen 12 764 adamǵa quqyqtyq, áleýmettik, psıhologııalyq qoldaý kórsetildi.
Saltanatty rásimde osy salada uzaq jyl abyroıly qyzmet etip júrgen eńbekkerlerge memlekettik nagrada tabys etildi. «Áleýmettik qorǵaý júıesiniń úzdik qyzmetkeri jáne úzdik áleýmettik joba», «Eńbek joly» konkýrsy oblystyq kezeńiniń jeńimpazdaryna qurmet kórsetildi. Shara sońynda Aqtóbe oblysy ákiminiń atynan 6 áleýmettik qyzmet kórsetý ortalyǵynyń árqaısysyna 3 mıllıon teńge kóleminde sertıfıkat tabystaldy. Olardyń arasynda qaladaǵy qarttar men múgedekter úıi, 18 jastan joǵary júıke aýrýlaryna shaldyqqan naýqastarǵa arnalǵan ınternat, 18 jasqa deıingi júıke aýrlary bar balalarǵa arnalǵan ınternat úıleri bar.
– Júıke syrqatyna shaldyqqan 3–18 jas arasyndaǵy balalarǵa ınternat úıi ótken jyldyń qańtarynda ashyldy. Qazirde 53 bala tárbıelenip jatyr. Bizde aýtızmge shaldyqqan, daýn syrqatymen dúnıege kelgen bala kóp. Internat tárbıelenýshileriniń basym kópshiligi – 2010, 2011 jyly dúnıege kelgen. Tárbıeshiler balany áleýmettendirýge daǵdylandyrady. Máselen óz tósegin, oıynshyqtaryn, ydystaryn jınap, jýynýǵa úıretedi. Ata-analary ár juma saıyn keshkilik saǵat 16.00–18.00 aralyǵynda kelip, balalaryna jolyǵyp kete alady, – deıdi №3 áleýmettik qyzmet kórsetý ortalyǵynyń dırektory Qarlyǵash Shalaeva.
«Áleýmettik eńbek salasynyń úzdigi» tósbelgisimen marapattalǵan Qarǵaly aýdandyq jumyspen qamtý jáne áleýmettik baǵdarlamalar bóliminiń basshysy Aıgúl Bıjanova osy salada 30 jyldan beri eńbek etip keledi. Tájirıbeli maman az qamtylǵan otbasy, múgedek, jumyssyzdar men D, E sanatyndaǵy ómirlik qıyn jaǵdaıda qalǵan otbasylarǵa kómek kórsetedi. Aýdanda 506 múgedek bar, sonyń ishinde 18 jasqa deıingi 661 bala tirkelgen. 30 otbasy ataýly áleýmettik kómek alady.
– Aýdanda jalǵyzbasty, ózdiginen júrip-turýy qıyn eresek 89 múgedek, kómekke muqtaj 7 bala bar. Qyzmetkerlerimiz aptasyna eki-úsh ret múgedek balalardyń úılerine baryp, birge ýaqyt ótkizedi. Jazýǵa úıretedi, birge sýret salady, syrtqa shyǵaryp serýendetedi. О́ńirdegi kómekke muqtaj, jalǵyzbasty múgedektigi bar 89 jannyń 35-i aýdan ortalyǵynda turady. Áleýmettik qyzmetker olardyń úıin tazalaıdy, azyq-túlik satyp ákeledi, kómir kirgizip, kúl shyǵarady. Aýyldardaǵy kómekke muqtaj jandar da nazardan tys qalmaıdy, – deıdi A.Bıjanova.
Áleýmettik qyzmetker bolý ońaı emes. Bul boıynda eńbekqorlyq pen adaldyq, qaıyrymdylyq, shydamdylyq, meıirimdilik sekildi qasıetter ushtasatyn adamdardyń ǵana qolynan keledi. Sol sebepti osy salada kóbinese áıelder eńbek etedi. Aıta ketý kerek, qamqorlyqqa muqtaj jandarǵa eń birinshi bolyp qol ushyn sozatyn áleýmettik qyzmetkerler kúni tuńǵysh ret bıyl erekshe atap ótildi. Endi jyl saıyn qazannyń sońǵy aptasynda merekelenetin bolady.
Aqtóbe oblysy
