Rejısser kóneden kele jatqan «Muńlyq-Zarlyq» epostyq jyryn jas kórermenge halyq ertegisi formatynda usyndy. Ertegishi sandyqtan kitapty alyp: «Bul ertegi kún men nur degen maǵyna bildiredi. On san noǵaı ishinde Shanshar atty han bolypty, qansha áıel alsa da bir perzentke zar bolypty...» dep bastap, «O, Qudaı men qartaıdym, báıbishem maǵan bir perzent syılaı almady. О́mirim urpaqsyz ótip barady», dep adamnyń saı súıegin syrqyratyp balalardy qoıylymǵa birden baýrap alady.
Han keıpindegi qýyrshaqqa kóz tartar qazaqtyń ulttyq kıimin kıgizgen. «O, han ıem, úmitińizdi úzbeńiz. Sizge murager syılaıtyn aıdaı sulý Hanshaıym alyp keldim» dep jany ashyǵan bolyp, mıyǵynan kúlgen báıbisheniń súıkimsiz kelbeti de nanymdy keskindelgen. Epostyq jyrda «hannyń alpys áıeli bar» dep aıtylsa, bul ertegide bir ǵana báıbisheniń aty atalady. Sebebi «alpys áıeli bar» degen sóz bala uǵymyna túsiniksiz bolatyny anyq. Han murager syılaıdy degen úmitpen Hanshaıymdy jar etip alady.
Arada toǵyz aı, on kún ótedi. Qyzǵanyshtyń qyzyl ıti ishin tyrnaǵan báıbishe Mystan kempirdi aldyrtyp, «muragerdiń kózin qurtý kerek, bir nárse oılap tap» dep buıryq beredi.
Sahna syrtynda hannyń qarqyldap kúlgen qýanyshty daýysy shyǵady. Han rólin somdaǵan ártis Janbolat Kamenov kúlkisiniń shynaıylyǵyna rıza boldyq.
Hannyń jas kelinshegine tisin qaırap júrgen báıbisheniń usqynsyz keıpin Gúlnur Asylbekova oınady. Qýyrshaq báıbisheniń basyn ońdy-soldy qozǵap, qolyn sermep, jańa týyp jatqan egiz náresteni mystanǵa berip, kózin qurtýǵa áreket etedi. Sahnada jańa týǵan náresteniń ińgálap jylaǵan daýysy estiledi. Mystan kempir (ártis Zere Tursymuratova) sebettegi jańa týǵan nárestelerdiń ornyna qasqyrdyń bóltirikterin salyp jiberedi.
«Endi qaıttim, men perzentimniń daýysyn óz qulaǵymmen estidim. Men senderden bas tartpaımyn, jabaıy tólder!» dep qos bóltirikti qushaqtap jylaǵan dármensiz Hanshaıymdy somdaǵan ártis Gúlim Moldabergenova kórermenniń aıaýshylyq sezimin oıata aldy.
Mystan ormanǵa baryp, balalardy tastyń ústine qaldyrady. Tas ústinde ińgálap jylap jatqan oraýly sábılerdi kórgen maral (bul rólde de ártis Zere Tursymuratova) sútin berip, balalardy asyraı bastaıdy. Erteginiń osy tusy keıbir adamda janýardaı jyly júrektiń joqtyǵyn jetkizedi.
Jyldar ótti. О́tip jatqan ýaqytty sazdy mýzyka arqyly ádemi jetkizedi. Osy rette mýzykamen kórkemdeýshi Irına Fedosenkonyń talǵamyna tánti boldyq. Al orman, taý-tas, jortyp júrgen janýarlar beınesin berýde qoıýshy sýretshi Jumabaı Sarsenov, sýretshi-dekorator H.Aıtpaev pen A.Sultanbektiń sheberligi baıqalady. Muńlyq (ártis Juldyz Kóktaı) pen Zarlyq (ártis Meıirjan Tólegenov) ormandaǵy túrli qustyń daýysyn aınytpaı salyp, qulyn-taıdaı tebisip, alysyp oınap jatqan shaǵyn qýyrshaqty sheber oınata bildi. Qoıylymdy kórip otyryp biz «qýyrshaqtyń bir jeri úzilip ketpese jarar edi» dep qoryqtyq. Bul shymyldyqtyń syrtynda qyzmet etip jatqan tehnıkalyq quramnyń qýyrshaqtardy sapaly jasaǵanynyń jemisi.
Ormannyń bergi betindegi Hanshaıymnyń bóltirikteri de ormannyń kósem bórisine aınalǵan edi. «Aý-ý-ýý» dep ulyp, ormanda erkin jortyp júrgen qasqyrlardyń rólin oınaǵan Janbolat Kamenov pen Arkadıı Pobedınskıı kishkentaı kórermenderdiń yqylasyna bólendi. Qasqyr jortyp kele jatyp, quldyrańdap júgirip júrgen balalarǵa jolyǵady. О́stip oqıǵa órbı kelip, Muńlyq pen Zarlyq analarymen jolyǵady.
«Osyǵan deıin qoıylyp júrgen dramada kúshikter qoldanylsa, bul ertegide bóltirikterdi paıdalandym. Bóltirik kúshikke qaraǵanda kúshtirek. «Qasqyrdyń terisin sypyrsań da, tektiligin sypyra almaısyń» dep bórini kıeli dep pir tutqan. Erteginiń sońynda báıbisheni jylanǵa aınaldyryp jiberdim. Jylan – jaǵymsyz obraz. Tilinen ýy tamǵan, hannyń qoınyna kirip alyp, zulymdyq jasap júrgen báıbisheniń róli osyǵan suranyp tur», deıdi qoıýshy rejısser Bekpýlat Parmanov.
«Qýyrshaq» teatrynyń trýppa meńgerýshisi Ulbosyn Baıysbek: «Shytyrman oqıǵaǵa toly eposty tereńdetpeı, balanyń sanasyna laıyqty ertegi retinde alyp shyqtyq. Kishkentaı kórermenin erlikke, adamgershilikke tárbıeleıtin qoıylym jasaǵymyz keldi», dedi ol.
Ulytaý oblysy
