Ekijaqty taýar aınalymyn ulǵaıtý, ınvestısııa, ónerkásip, aýyl sharýashylyǵy, sıfrlyq ındýstrııa, JI salasyndaǵy, sondaı-aq kólik pen logıstıka, densaýlyq saqtaý, týrızm sııaqty taǵy da basqa salalardaǵy yntymaqtastyqty tereńdetý týraly jospar qaraldy.
«Elderimizdiń kóshbasshylary Prezıdent Qasym-Jomart Toqaev pen Belarýs Respýblıkasynyń Prezıdenti Aleksandr Grıgorevıch Lýkashenkonyń saıası erik-jigeri men turaqty baılanysynyń arqasynda eki el arasyndaǵy qarym-qatynas qarqyndy damyp keledi. Barlyq deńgeıdegi senimdi dıalog pen strategııalyq sıpatqa ıe. Úkimet saýda-ekonomıkalyq jáne basqa da qarym-qatynastarymyzdyń qarqyndy ári ózara tıimdi negizde damýy úshin bar kúsh-jigerin salýǵa daıyn», dedi O. Bektenov.
Taraptar ónerkásip kooperasııasyn odan ári damytý men birlesken jobalardy júzege asyrý máselelerin talqylady. Sıfrlyq salada JI elementterin engizý boıynsha tájirıbe almasýǵa basymdyq berilip otyr.
«Biz úshin Qazaqstan saýda-ekonomıkalyq qarym-qatynastardaǵy basym seriktesimiz. Sondyqtan bul baılanystardy barlyq jaǵynan da damytýǵa daıynbyz. Bizdiń kezdesýimiz eki el arasyndaǵy birlikti nyǵaıta túsedi», dedi A.Týrchın.
Aýyl sharýashylyǵynda AО́K ónimderin qaıta óńdeý, óndirý jobalaryna basa nazar aýdarylady. Salanyń tıimdiligin arttyrý úshin agrarlyq ǵylymdaǵy yntymaqtastyqqa asa mán beriledi. Otandyq dıqandar bıyl aýyl sharýashylyǵy daqyldarynan mol ónim jınady, mundaı kórsetkishke olar bir jaǵy agrotehnologııalardy qoldaný nátıjesinde qol jetkize aldy.
Kezdesýge qatysýshylar kólik jáne logıstıka salasyndaǵy ózara is-qımyldyń mańyzdylyǵyn atap ótti. Salalyq vedomstvolardyń úılesimdi jumysy eki memleket arasyndaǵy temirjol jáne avtomobıl úderisin jańǵyrtyp otyr. Sonymen qatar jańa eksporttyq naryqqa shyǵý úshin kólik dálizderin damytýda zor áleýet bar.
Sondaı-aq óńiraralyq yntymaqtastyq pen mádenı-gýmanıtarlyq saladaǵy ózara is-qımyl máseleleri de talqylandy. Kezdesý qorytyndysynda Qazaqstan men Belarýs premer-mınıstrleriniń qatysýymen ekijaqty birqatar qujatqa qol qoıyldy. Onyń ishinde О́nerkásip jáne qurylys mınıstrligi men Belarýs Respýblıkasynyń О́nerkásip mınıstrligi arasyndaǵy ónerkásiptik kooperasııa salasyndaǵy yntymaqtastyqty damytýdyń 2026–2028 jyldarǵa arnalǵan jol kartasy bar. Astana qalasynyń ákimdigi men Mınsk qalalyq atqarý komıteti arasyndaǵy 2026–2028 jyldarǵa arnalǵan saýda-ekonomıkalyq, ǵylymı-tehnıkalyq jáne mádenı yntymaqtastyq týraly jol kartasy da nazardan tys qalmady. Almaty oblysynyń ákimdigi men Vıtebsk oblystyq atqarý komıteti arasyndaǵy saýda-ekonomıkalyq, ǵylymı-tehnıkalyq, mádenı-gýmanıtarlyq salalardaǵy yntymaqtastyq týraly memorandýmynyń da mańyzy arta tústi.
