Qatarda ótken jahandyq jıyn

Is-sharaǵa 180 joǵary deń­geıdegi ókil qatysty. Olar­dyń qatarynda memleket jáne úkimet basshylary, mınıstrler, halyqaralyq uıymdardyń ókil­deri boldy. Sammıtke akade­mııa­lyq orta, bıznes ókilderi men úkimettik emes uıymdar da qosyldy. Jıynnyń negizgi maqsaty – jahandyq áleýmettik máselelerdi talqylaý, áleýmettik turaq­tylyqty kúsheıtý, ınklıý­zıvti ekonomıkalyq ósýdi damytý ári BUU-nyń ornyqty damý maqsattaryna qol jetkizý joldaryn qarastyrý.

Elimizdiń delegasııasynyń basshysy plenarlyq otyrys­ta sóz sóılep, áleýmettik damýdyń ádil, turaqty álem qurýdaǵy mańyzyn atap ótti. Onyń aıtýynsha, Prezıdent Qasym-Jomart Toqaevtyń basshylyǵymen elimizde azamat­tardyń ál-aýqatyn arttyrý, teń múmkindikter qamtamasyz etý, áleýmettik ádilettilikti kúsheıtý baǵytynda keń aýqymdy reformalar júrgizilip jatyr.

Premer-mınıstrdiń orynbasary elimizdiń jańa tehnologııalardy tıimdi paıdalaný arqyly óńirlik kóshbasshy ekenin aıtty. Ol ekonomıkamyzdyń ósýin qoldaý men halyqtyń ómir sapasyn jaqsartý úshin ınnovasııa men sıfrlandyrý salasyndaǵy basymdyqtardy aıtty.

Ǵalymjan Qoıshybaev elimiz Birikken Ulttar Uıymy Jarǵysynyń qaǵıdattaryna berik ekenin atap ótti. Elimizdiń halyqaralyq yntymaqtastyqqa, ádilet pen adamı qadir-qasıetke negizdelgen bolashaq qurýǵa beıildi ekenin jetkizdi.

Sammıt aıasynda Qatar Memleketiniń Premer-mınıstri jáne Syrtqy ister mınıstri sheıh Muhammed ben Abdýlrahman Ál Tánımen ekijaqty kelissózder ótti. Taraptar eki el arasyndaǵy strategııalyq seriktestikti atap ótip, energetıka, telekommýnıkasııamen qatar basqa da baǵyttar boıynsha birlesken jobalardy talqylady. Sondaı-aq Prezıdent Qasym-Jomart Toqaevtyń 2024 jylǵy aqpandaǵy Qatarǵa saparynda jasalǵan kelisimderdi iske asyrýǵa nazar aýdaryldy.

Sapar barysynda Ǵalymjan Qoıshybaev Qatardyń baılanys jáne aqparattyq tehnologııalar mınıstri Muhammed ben Álı Ál-Manaıımen kezdesti. Taraptar sıfrlandyrý, tele­kommýnıkasııalyq ınfra­qu­rylym jáne elektron­dyq úkimet salasynda tájirıbe alma­sý múm­kin­dikterin qaras­tyr­dy.

Sondaı-aq delegasııa basshysy «Power International Holding» kompanııasynyń tóraǵasy Mýataz Ál-Haıatpen kezdesti. Taraptar holdıngtiń elimizdegi jobalaryn iske asyrý máselelerin talqylady.